ក្រុមគ្រូពេទ្យ នៃមន្ទីរពេទ្យគន្ធបុប្ផា បានជួយស្រោចស្រង់ជីវិតក្មេងស្រីម្នាក់ទាន់ពេល បន្ទាប់​ពី​ក្មេ​ង​ស្រី អាយុ៩ឆ្នាំម្នាក់បានកើតជំងឺគ្រុនឈាមវិវត្តរហូតដល់ហូរឈាមតាមក្រពះ ពោះវៀន និង​ហើម​សួតជាដើម។

តាមរយៈផេកហ្វេសបុក ដែលមានឈ្មោះថា Dr Beat Richber នាថ្ងៃទី៥ ខែធ្នូ ឆ្នាំ២០២៣នេះ បានឲ្យដឹងថា ជំងឺគ្រុនឈាម ដែលវិវត្តយ៉ាងលឿនទៅជាធ្ងន់ធ្ងរស្មុគស្មាញ និង​បណ្តាល​ឲ្យ​ហូរ​ឈាម​ក្រពះ​ពោះវៀន និងហើមសួត, ជាករណីពិបាកព្យាបាល និងមានហានិភ័យខ្ពស់ ។ ក្មេង​ស្រីម្នាក់​នេះ អាយុ៩ឆ្នាំ ត្រូវបានព្យាបាលជំងឺគ្រុនឈាម បញ្ចូលសេរ៉ូមអស់២លីត្រ មុនមកដល់​មន្ទីរ​ពេទ្យគន្ធបុប្ផា ។

តាមរយៈផេកហ្វេសបុកនេះបានឲ្យដឹងទៀតថា គាត់(ក្មេងស្រី)​មាន​ជំងឺ​គ្រុន​ឈាម​កម្រិត​ធ្ងន់ធ្ងរ​ស្មុគ​ស្មាញ​បំផុត (EDS): អស់ជីពចរច្រើនដង (iterative and impending shock syndrome) និងហូរឈាមក្នុងក្រពះពោះវៀន និងហើមសួត ចុងក្រោយសន្លប់បាត់ស្មារតី តែ​ទោះ​ជា​យ៉ាងណាក្មួយស្រី ត្រូវបានសង្រ្គោះជីវិត ដោយប្រើឈាម-ប្លាស្មាអស់១០ប្លោក និង​ចម្រោះ​ប្លាកែត សរុបអស់"៤ប្លោក" និងប្រើជំនួយម៉ាស៊ីនសប់ដង្ហើម ថែទាំព្យាបាលអស់រយ:ពេល២៨ថ្ងៃ ហើយ​ថ្ងៃនេះ ក្មួយស្រីមានជីវិតរស់ឡើងវិញ ដោយស្នាមញញឹម។

នៅក្នុងផេកហ្វេសបុកខាងលើនេះក៏បានថ្លែងអំណរអរគុណនិងកោតសរសើរដល់ក្រុមគ្រូពេទ្យឯកទេស​សង្គ្រោះបន្ទាន់នៃមន្ទីរពេទ្យគន្ធបុប្ផាភ្នំពេញ ដែលបានសង្គ្រោះជីវិតមួយនេះ។ អរគុណ​មជ្ឈ​មណ្ឌល​ជាតិ​ផ្តល់ឈាម ដែលតែងតែផ្តល់ចម្រោះប្លាកែតទាន់ពេលវេលា ដោយឥតគិតថ្លៃ រាល់​ការ​ព្យាបាល​ទាំងអស់គឺឥតគិតថ្លៃ សម្រាប់គ្រប់ៗគ្នា ដោយគ្មានការរើសអើង ហើយជាងនេះ​ទៅ​ទៀត​ក៏​សូម​អរគុណមូលនិធិគន្ធបុប្ផាកម្ពុជា និងមូលនិធិគន្ធបុប្ផាស្វីស និងសប្បុរស​ជន​គ្រប់​លំដាប់​ថ្នាក់​ដែល​បាន​និងតែងតែគាំទ្រដល់ដំណើរការមន្ទីរពេទ្យគន្ធបុប្ផាផងដែរ៕ អត្ថបទ៖ បាន ចក់