លោក វីទីត មុនតាប៊ន អ្នករាយការណ៍សិទ្ធិមនុស្សប្រចាំកម្ពុជា វាយតម្លៃថា ស្ថានភាពសិទ្ធិមនុស្សនៅកម្ពុជាមានការវិវឌ្ឍន៍ល្អប្រសើរ។
ថ្លែងប្រាប់អ្នកសារព័ត៌មានក្រោយជំនួបពិភាក្សាការងាររវាងឯកឧត្តមទេសរដ្ឋមន្រ្តី កែវ រ៉េមី ប្រធានគណៈកម្មាធិការសិទ្ធិមនុស្សកម្ពុជា បានអញ្ជើញជាមួយលោក វីទីត មុនតាប៊ន អ្នករាយការណ៍ពិសេសអង្គការសហប្រជាជាតិទទួលបន្ទុកស្ថានភាពសិទ្ធិមនុស្សប្រចាំកម្ពុជា លោកប៉ា ប៉ុណ្ណារ៉ាដា អ្នកនាំពាក្យគណៈកម្មាធិការសិទ្ធិមនុស្សកម្ពុជា បានឲ្យដឹងថា ក្នុងជំនួបនៅថ្ងៃនេះភាគីទាំងពីរបានពិភាក្សាលើវឌ្ឍនភាពលើយន្តការពិនិត្យជាសកលតាមកាលកំណត់ (UPR) ជុំទី៣ សម្រាប់រៀបចំជារបាយការណ៍ដាក់ជូនអង្គការសហប្រជាជាតិ, សេចក្តីព្រាងច្បាប់បង្កើតស្ថាប័នជាតិសិទ្ធិមនុស្សកម្ពុជា និងស្ថានភាពក្នុងពន្ធនាគារ។
នាឱកាសនោះ អ្នករាយការណ៍ពិសេសអង្គការសហប្រជាជាតិទទួលបន្ទុកស្ថានភាពសិទ្ធិមនុស្សប្រចាំកម្ពុជា បានវាយតម្លៃថា ស្ថានភាពសិទ្ធិមនុស្សនៅកម្ពុជាមានការវិវឌ្ឍន៍ល្អប្រសើរ តាមរយៈដំណើរការរៀបចំស្ថាប័នសិទ្ធិមនុស្សកម្ពុជា ដែលយកចិត្តទុកដាក់លើបញ្ហាសិទ្ធិមនុស្សសេដ្ឋកិច្ច សង្គម និងវប្បធម៌។
សូមជម្រាបថា ក្នុងដំណើរទស្សនកិច្ចលើកទី២ នៅកម្ពុជារបស់ លោក វីទីត មុនតាប៊ន ក្នុងគោលបំណងស្វែងយល់ពីវឌ្ឍនភាពនៃស្ថានសិទ្ធិមនុស្សនៅកម្ពុជា សេចក្តីព្រាងច្បាប់ស្តីពីការរៀបចំ និងការប្រព្រឹត្តទៅនៃគណៈកម្មាធិការសិទ្ធិមនុស្សជាតិកម្ពុជា កិច្ចការ និងសមិទ្ធផលរបស់គណៈកម្មាធិការសិទ្ធិមនុស្សកម្ពុជា និងប្រធាន បទមួយចំនួនទៀតពាក់ព័ន្ធនឹងវិស័យសិទ្ធិមនុស្ស៕ អត្ថបទ៖ សេក ឧត្តម
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
