ភ្នំពេញ÷ តំណាងអយ្យការអមសាលាដំបូងរាជធានីភ្នំពេញបានសម្រេចចោទប្រកាន់ជនបរទេសចំនួន ១២នាក់ ទាក់ទិននឹងករណីចាប់ ឃុំឃាំង និងបង្ខាំងមនុស្សដោយខុសច្បាប់។

លោក វ៉ិត មឃៈ ព្រះរាជអាជ្ញារង និងជាអ្នកនាំពាក្យអយ្យការអមសាលាដំបូងរាជធានីភ្នំពេញបានឲ្យដឹងនៅល្ងាចថ្ងៃទី០៥ ខែធ្នូ ឆ្នាំ២០២៣ថា តំណាងអយ្យការបានចេញដីកាសន្និដ្ឋានបញ្ជូនរឿងឱ្យស៊េីបសួរ លេីជនសង្ស័យចំនួន ១២នាក់ ពីបទ ចាប់ ឃុំឃាំង និងបង្ខាំងដោយខុសច្បាប់ ជាបទល្មេីសព្រហ្មទណ្ឌដែលមានចែងឱ្យផ្តន្ទាទោសតាមបញ្ញត្តិមាត្រា ២៥៣ និងមាត្រា ២៥៤ នៃក្រមព្រហ្មទណ្ឌ។

សូមជម្រាបថា ការចោទប្រកាន់នេះ គឺបន្ទាប់ពីកម្លាំកងរាជអាវុធហត្ថរាជធានីភ្នំពេញបានបើកប្រតិបត្តិការឡោមព័ទ្ធផ្ទះវីឡាមួយកន្លែង ស្ថិតនៅតាមបណ្ដោយផ្លូវ កែវ ចិន្តា សង្កាត់ជ្រោយចង្វារ ខណ្ឌជ្រោយចង្វារ កាលពីវេលាម៉ោង១២យប់រំលងអធ្រាត្រ ឈានចូលថ្ងៃទី០១ ខែធ្នូ ឆ្នាំ២០២៣ ដោយបានឃាត់ខ្លួនជនបរទេស និងខ្មែរសរុបចំនួន ១៣នាក់ និងបានរំដោះជនរងគ្រោះ ក្រោយពីទទួលបានព័ត៌មានពីជនរងគ្រោះបានហៅទូរស័ព្ទសុំជំនួយតាមរយៈប្រព័ន្ធទូរស័ព្ទ HOT LINE ១២៩១ ដោយសង្ស័យជាប់ពាក់ព័ន្ធករណីបង្ខាំងមនុស្សដោយខុសច្បាប់។

ករណីនេះប្រភពព័ត៌មានបានឱ្យដឹងថា ក្នុងប្រតិបត្តិការនោះក៏មានផ្ទុះអាវុធជាច្រើនគ្រាប់ផងដែរ ទើបសមត្ថកិច្ចឃាត់ខ្លួនជនសង្ស័យបានចំនួន ១៣នាក់ មានបុរសជនជាតិបង់ក្លាដេស ១២នាក់ មានជនជាតិខ្មែរម្នាក់ ភេទស្រី ព្រមទាំងរំដោះបានជនរងគ្រោះជនជាតិចិនចំនួន ០២នាក់៕

អត្ថបទ ៖ ប្រាក់ វ៉ាន់ដា