អ្នកនាំពាក្យរដ្ឋភិបាលប្រទេសកេនយ៉ា លោក អ៊ីសាកវ៉ូរ៉ា (Isaac Mwaura) បាននិយាយ​កាល​ពី​ថ្ងៃ​អង្គារ​ថា យោងតាមមន្ត្រីរដ្ឋាភិបាល ចំនួនអ្នកស្លាប់ដោយសារភ្លៀងធ្លាក់ខ្លាំង និង​ទឹក​ជំនន់​ដ៏​គំហុក​នៅ​ក្នុងប្រទេសកេនយ៉ាបានកើនឡើងដល់១៦០នាក់ ខណៈមនុស្ស​ចំនួ​ន​៥២៩​.១២០​នាក់​ បានជម្លៀសចេញពីលំនៅឋានប្រមាណ១០៥.៨២៤ខ្នង ។

អ្នកនាំពាក្យរដ្ឋាភិបាលរូបនេះបាននិយាយនៅក្នុងសេចក្តីថ្លែងការណ៍មួយដែលបានចេញផ្សាយកាលពី​ល្ងាច​ថ្ងៃចន្ទនៅរដ្ឋធានីណៃរ៉ូប៊ី ប្រទេសកេនយ៉ាថា ទឹកជំនន់​ដ៏មហន្តរាយ​ដែល​បង្ក​ឡើង​ដោយ​ភ្លៀង​ នៃបាតុភូត អេលនីញ៉ូ (El Nino) ដ៏សកម្មខុសពីធម្មតា បានវាយប្រហារ​ផ្នែក​ជា​ច្រើន​នៃ​ប្រទេសអាហ្វ្រិកខាងកើតមួយនេះ។  

លោកក៏បាននិយាយផងដែរថា ភ្លៀងធ្លាក់ខ្លាំងលាយឡំជាមួយព្យុះ ត្រូវបានគេរំពឹងថា​នឹង​អម​ដោយ​ភ្លៀង​ធ្លាក់ខ្លាំងពេញមួយសប្តាហ៍នេះ រហូតដល់ថ្ងៃទី ១១ ខែធ្នូ នៅទូទាំងប្រទេស។ លោក​បាន​កត់​សម្គាល់ថា ទឹកជំនន់ជាបន្តបន្ទាប់បានបង្កឱ្យមានជំងឺអាសន្នរោគ និងជំងឺឆ្លងតាមទឹក ខណៈ​ដែល​ក្រុមអាជ្ញាធរសុខាភិបាលបានបញ្ជាក់ពីករណីជំងឺអាសន្នរោគចំនួន ១០៣ ករណី​នៅ​ក្នុង​ស្រុកឡាមូ (Lamu)នៅស្ថិតនៅតាមតំបន់ឆ្នេរសមុទ្រកេនយ៉ា ដែលបណ្តាល​ឱ្យ​មាន​អ្នក​ស្លាប់​ពីរ​នាក់​រួច​មក​ហើយ។

លោកបានបន្ថែមថាលើសពីនេះក្រសួងកសិកម្មគ្រោងចែកចាយវ៉ាក់សាំងប្លូថាំង(Bluetongue)ចំនួន ៤៥០.០០០ ដូស និងវ៉ាក់សាំងគ្រុនក្តៅ Rift Valley ចំនួន ១,៤ លានដូស សម្រាប់សត្វគោ ដើម្បី​បង្កើនការចាក់ថ្នាំបង្ការនៅតំបន់ដែលរងផលប៉ះពាល់។

របាយការណ៍របស់រដ្ឋាភិបាល និងភ្នាក់ងារមនុស្សធម៌បាននិយាយថា លំនៅឋាន​រាប់​ពាន់​ខ្នង​ត្រូវ​បាន​ហូរ​គួចតាមទឹក ឬលិចលង់ ដីស្រែចំការបានលិចទឹក និងសត្វពាហនៈបានលង់ទឹកងាប់៕