ក្នុងព្រឹត្តិការណ៍ពិព័រណ៌ឧស្សាហកម្មសំណង់កម្ពុជា-អន្តរជាតិ និងសន្និបាតបូកសរុបការងារប្រចាំឆ្នាំ លើកទី១៣ របស់សមាគមន៍អ្នកសាងសង់កម្ពុជារយៈពេល៣ថ្ងៃ បើកជាផ្លូវការនៅព្រឹកថ្ងៃទី៦ ខែធ្នូនេះ ក្រុមហ៊ុនសំណង់ជាតិ អន្តរជាតិ ប្រមាណជាង ១៣០ ក្រុមហ៊ុន និងមានផលិតផល និងសេវាកម្ម ក្នុងវិស័យសំណង់ជាង ១០០០ មុខ បានដាក់តាំងបង្ហាញក្នុងព្រឹត្តិការណ៍នេះ។
ថ្លែងបើកពិព័រណ៌ឧស្សាហកម្មសំណង់កម្ពុជា អន្តរជាតិលើកទី១៣ ឯកឧត្តម ផារ៉ា មង្គល រដ្ឋលេខាធិការក្រសួងរៀបចំដែនដី នគរូបណីយកម្ម និងសំណង់ ថ្លែងថា ការរៀបចំព្រឹត្តិការណ៍ពិព័រណ៌ឧស្សាហកម្មសំណង់ ប្រចាំឆ្នាំរបស់សមាគមន៍អ្នកសាងសង់កម្ពុជា គឺបានបង្ហាញពី បច្ចុប្បន្នភាពវិស័យសំណង់កម្ពុជា និង ភាពសំបូរបែប ផលិតផល និងសេវាកម្ម សំណង់ ទាំងក្នុងស្រុក និងនាំចូលពីក្រៅស្រុកជាច្រើន សម្រាប់ប្រើប្រាស់ក្នុងការសាងសង់ បម្រើឲ្យការងារសាងសង់ និងជំរុញវិស័យសំណង់នៅកម្ពុជា មានភាពរីកចំរើន។
អ្នកឧកញ៉ា ពុង ឃាវសែ ប្រធានសមាគមន៍អ្នកសាងសង់កម្ពុជា បានថ្លែងថា ព្រឹត្តិការណ៍តាំងពិព័រណ៌ឧស្សាហកម្មសំណង់កម្ពុជា-អន្តរជាតិ ឆ្នាំ២០២៣នេះ មានក្រុមហ៊ុនជាតិអន្តរជាតិចូលរួមយកផលិតផលខ្លួនមកតាំងបង្ហាញមានចំនួន ១៣៣ ក្រុមហ៊ុន មានស្តង់ចំនួន ២៣៩ ស្តង់ មានផលិតផលគ្រឿងសំណង់ ប្រមាណជាង ១០០០ មុខ និងមានផលិតផលសេវាផ្នែកសំណង់ប្រមាណជាង៥០ប្រភេទ កើនឡើងជាងឆ្នាំកន្លងមក ដែលនេះបង្ហាញភាពសំបូរបែប ការប្រកួតប្រជែង និងផ្តល់ជម្រើសសម្រាប់អ្នកប្រើប្រាស់។
តាមរបាយការណ៍របស់សមាគមន៍អ្នកសាងសង់កម្ពុជាអានដោយឧកញ៉ា ឆារស៍ វ៉ាន់ បានឱ្យដឹងថាសមាគមអ្នកសាងសង់កម្ពុជា បានបង្កើតឡើង១២ឆ្នាំហើយដែលបច្ចុប្បន្នមានក្រុមហ៊ុនសំណង់ជាសមាជិកចំនួន ៧៤ ក្រុមហ៊ុន ខណៈតាមទិសដៅឆ្នាំបន្ទាប់ សមាគមន៍នឹងបន្តគៀងគរប្រមូលក្រុមហ៊ុនសំណង់នានាបន្ថែមទៀតចុះឈ្មោះជាសមាជិកសមាគមន៍ និងបង្កើនការផ្សព្វផ្សាយក្នុងវិស័យសំណង់ ឱ្យមានការគោរពច្បាប់ឲ្យបានត្រឹមត្រូវ និងជំរុញវិស័យសំណង់នៅកម្ពុជាឲ្យបន្តរីកចំរើនទៅមុខបន្ថែមទៀត៕ អត្ថបទ៖ ស៊ុម សុខជា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
