ប្រធានាធិបតីហ្គីយ៉ាន លោក Irfaan Ali កាលពីយប់ថ្ងៃអង្គារ (ទី៥ ខែធ្នូ) បានហៅការធ្វើប្រជាមតិលើតំបន់ត្រួតត្រារបស់វេណេហ្សុយអេឡា ពាក់ព័ន្ធនឹងតំបន់សម្បូរប្រេង Esequibo ថា ជា «ការគំរាមកំហែងដោយផ្ទាល់»។

លោក Ali បាននិយាយថា វេណេហ្ស៊ុយអេឡា បានគំរាមកំហែងដល់ «បូរណភាពទឹកដី អធិបតេយ្យភាព និងឯករាជ្យភាពនយោបាយ» របស់ប្រទេសលោក។

សូមបញ្ជាក់ថា ការមានភាពតានតឹងជាមួយវេណេហ្ស៊ុយអេឡា ជុំវិញតំបន់ Esequibo ដែលជាតំបន់សម្បូរប្រេងដ៏មានសក្ដានុពល បានកើនឡើង នាពេលថ្មីៗនេះ បន្ទាប់ពីការបោះឆ្នោតប្រជាមតិរបស់វេណេហ្ស៊ុយអេឡា បានច្រានចោលយុត្តាធិការរបស់តុលាការអន្តរជាតិ ពាក់ព័ន្ធនឹងជម្លោះទឹកដី រវាងបណ្ដាប្រទេសជិតខាង។

ប្រទេសហ្គីយ៉ាន ដែលបច្ចុប្បន្នកំពុងផលិតប្រេង និងឧស្ម័នប្រហែល ៤០០.០០០បារ៉ែលក្នុងមួយថ្ងៃ នៅឆ្នាំនេះ បានទទួលបាននូវការដេញថ្លៃ សម្រាប់ប្លុកទឹករាក់ និងទឹកជ្រៅថ្មីពីបណ្ដាក្រុមហ៊ុនក្នុងស្រុក និងបរទេស នៅក្នុងការប្រកួតដេញថ្លៃអន្តរជាតិលើកដំបូងរបស់ខ្លួន។ អាជ្ញាប័ណ្ណរុករកសម្រាប់តំបន់ទាំងនោះ មិនទាន់ត្រូវបានចុះហត្ថលេខានៅឡើយទេ។

ក្រុមអ្នកវិភាគបាននិយាយថា ការធ្វើប្រជាមតិ គឺជាគោលបំណងរបស់ប្រធានាធិបតីវេណេហ្សុយអេឡាលោក Nicolas Maduro ដើម្បីវាស់ស្ទង់ការគាំទ្ររបស់រដ្ឋាភិបាលរបស់លោក នៅមុនការបោះឆ្នោតប្រធានាធិបតីឆ្នាំ២០២៤៕