រដ្ឋាភិបាល នៃប្រទេសណូវែលហ្សឺឡង់ បានផ្តល់នូវហិរញ្ញប្បទានបន្ថែមចំនួន ៥ លានដុល្លារ​ណូវែលហ្សឺឡង់ ស្មើនឹងជាង៣លាន១សែនដុល្លារអាមេរិក ក្នុងគម្រោង​បោស​សម្អាតមីន ដើម្បី​លទ្ធផល​ដំណាក់កាលទី៤ ដែលសម្របសម្រួលដោយអង្គការ UNDP ។ តាមរយៈគម្រោងនេះ អាជ្ញាធរមីន បាននិងកំពុងរៀបចំផែនការបោសសម្អាតមីនក្នុងខេត្តបន្ទាយមានជ័យ និង​ខេត្តព្រះវិហារ។

ការផ្តល់នេះធ្វើឡើងក្នុងកិច្ចប្រជុំក្រុមប្រឹក្សាភិបាលគម្រោងបោសសម្អាតមីនដើម្បីលទ្ធផលដំណាក់​កាលទី៤ ប្រព្រឹត្តិទៅនៅខេត្តបន្ទាយមានជ័យ នាថ្ងៃទី០៦ ខែធ្នូ ឆ្នាំ ២០២៣ ដោយ​ឯកឧត្តម​ទេសរដ្ឋ​មន្ត្រី​ លី ធុជ អនុប្រធានទី ១នៃអាជ្ញាធរមីនដែល​បាន​ចុះហត្ថលេខា​លើ​កិច្ច​ព្រម​ព្រៀង​ហិរញ្ញប្ប​ទាន​រវាងកម្មវិធីអភិវឌ្ឍន៍សហប្រជាជាតិ(UNDP) ដែលតំណាងដោយលោកស្រី Alissar Chaker ប្រធាន UNDPប្រចាំកម្ពុជា និងក្រសួងការបរទេស និងពាណិជ្ជ កម្ម នៃ​ប្រទេស​ណូវែលហ្សឺឡង់ តំណាងដោយ ឯកឧត្តម Jonathan Kings ឯកអគ្គរាជ​ទូត​ណូវែលហ្សឺឡង់​ប្រចាំ​កម្ពុជា​។

ឯកឧត្តម Jonathan Kings ឯកអគ្គរាជទូតណូវែលហ្សឺឡង់ បានលើកឡើងថា សកម្មភាព​មីន​នៅ​កម្ពុជា​ពិតជាមានផលវិជ្ជមានដល់ប្រជាពលរដ្ឋកម្ពុជា។ ហើយក៏បាន​កោត​សរសើរ​កម្ពុជា​ផង​ដែរ ដែលបានបំពេញការងារយ៉ាងល្អក្នុងកិច្ចសង្គ្រោះជនរងគ្រោះ និងការ​បញ្ជ្រាប​យេន​ឌ័រ​ចូល​ក្នុង​សកម្មភាព​មីន​។ ឯកឧត្តម ក៏បានគូសបញ្ជាក់ផងដែរថា ដើម្បីសម្រេចបានគោលដៅរួម វា​ទាមទារ​ឱ្យ​មានកិច្ចសហប្រតិបត្តិការខ្ពស់ ហើយទោះបីជាកម្ពុជាសម្រេចបានសមិទ្ធផលគួជាទីកត់សម្គាល់ កម្ពុជានៅមានកិច្ចការជា ច្រើនទៀតដែល​ត្រូវ​ធ្វើ​ដើម្បី​ធានា​សម្រេច​បាន​គោល​ដៅ​កម្ពុជា​គ្មាន​មីន​ឆ្នាំ​២០២៥​។

ក្នុងនាម សម្តេចធិបតី នាយករដ្ឋមន្រ្តី ឯកឧត្តម លី ធុជ​ បាន​ថ្លែង​អំណរ​គុណ​យ៉ាង​ជ្រាល​ជ្រៅ​ជូន​ចំពោះ​រដ្ឋាភិបាល និងប្រជាជននៃប្រទេសណូវែលហ្សឺឡង់ ដែលបានផ្តល់​ការ​គាំទ្រ​ដល់​សកម្មភាព​មីន​មនុស្សធម៌នៅកម្ពុជាជាលើកទី២ នេះ ដោយកាលពីឆ្នាំ២០២១កន្លងទៅ ប្រទេស​ណូវែលហ្សឺឡង់នេះ ក៏បានផ្តល់ហិរញ្ញប្បទានដល់គម្រោងបោស សម្អាតមីន ដើម្បី​លទ្ធផល​ដំណាក់​កាលទី៤ ចំនួន ៣,៨ លាន ដុល្លារអាមេរិកផងដែរ៕ អត្ថបទ៖ ភារម្យ