ក្រុមសិទ្ធិមនុស្សដែលមានមូលដ្ឋាននៅទីក្រុងសេអ៊ូល ប្រទេសកូរ៉េខាងត្បូង នៅថ្ងៃព្រហស្បតិ៍ (ទី៧ ខែធ្នូ) នេះ បានឲ្យដឹងថា ជនជាតិកូរ៉េខាងជើងរហូតដល់ទៅ ៦០០នាក់ បាន «បាត់ខ្លួន» បន្ទាប់ពីត្រូវបានបង្ខំនិរទេសដោយប្រទេសចិន កាលពីខែតុលា ដោយព្រមានថា ពួកគេអាចប្រឈមនឹងការជាប់ពន្ធនាគារ ការធ្វើទារុណកម្ម អំពើហិង្សាផ្លូវភេទ និងការប្រហារជីវិត នៅក្នុងរដ្ឋឯកោមួយនេះ។

របាយការណ៍របស់ក្រុមការងារយុត្តិធម៌អន្តរកាល (TJWG) បានកើតឡើងប្រហែល ២ខែ បន្ទាប់ពីប្រទេសកូរ៉េខាងត្បូង បានធ្វើការតវ៉ាជាមួយប្រទេសចិន ជុំវិញការធ្វើមាតុភូមិនិវត្តន៍ ដែលត្រូវបានសង្ស័យថា មានជនជាតិកូរ៉េខាងជើងមួយចំនួនធំ ដែលកំពុងព្យាយាមភៀសខ្លួនទៅកាន់កូរ៉េខាងត្បូង។

TJWG បានឲ្យដឹងថា អ្នករត់ភៀសខ្លួនរាប់រយនាក់ត្រូវបានដឹកជញ្ជូនតាមឡានក្រុង និងឡានដឹកទំនិញ ដែលមានការយាមល្បាតពីមណ្ឌលឃុំឃាំងរបស់ចិនឆ្លងកាត់ព្រំដែនទៅកាន់កូរ៉េខាងជើង កាលពីថ្ងៃទី៩ ខែតុលា ដោយហៅហេតុការណ៍នេះថា ជាការធ្វើមាតុភូមិនិវត្តន៍ធំបំផុត ក្នុងរយៈពេលជាច្រើនឆ្នាំមកនេះ។ របាយការណ៍បានបន្តថា អត្តសញ្ញាណអ្នករត់ភៀសខ្លួននោះ មិនទាន់ដឹងនៅឡើយទេ ប៉ុន្តែភាគច្រើនជាស្ត្រី។

ប្រព័ន្ធផ្សព្វផ្សាយរដ្ឋរបស់កូរ៉េខាងជើងមិនបានធ្វើអត្ថាធិប្បាយលើករណីនេះទេ ប៉ុន្តែជាយូរមកហើយ បានបរិហារអ្នករត់ភៀសខ្លួនពីប្រទេសថា ជា «បុគ្គលអាក្រក់» ហើយមេដឹកនាំ លោក Kim Jong Un បានរឹតបន្តឹងព្រំដែនបន្ថែមទៀត ក្នុងរយៈពេលប៉ុន្មានឆ្នាំចុងក្រោយនេះ។

ក្រសួងការបរទេសរបស់ទីក្រុងប៉េកាំង បានបដិសេធកាលពីខែតុលាថា មិនមាន «មនុស្ស ដែលហៅថា អ្នករត់ភៀសខ្លួន» ក្នុងប្រទេសចិននោះទេ ប៉ុន្តែបាននិយាយថា ជនជាតិកូរ៉េខាងជើង បានចូលប្រទេសដោយខុសច្បាប់ ដោយសារហេតុផលសេដ្ឋកិច្ច ហើយថា ប្រទេសចិនតែងតែដោះស្រាយបញ្ហានេះតាមច្បាប់៕