សហរដ្ឋអាមេរិក បានដាក់ទណ្ឌកម្មកាលពីថ្ងៃព្រហស្បតិ៍ (០៧ ធ្នូ) លើបុគ្គល និងអង្គភាពចំនួន ១៣ សម្រាប់ការចោទប្រកាន់ថាបានបង្កកប្រាក់រាប់សិបលានដុល្លារជារូបិយប័ណ្ណបរទេសដល់ក្រុមឧទ្ទាមហ៊ូធី (Houthi) របស់ប្រទេសយេម៉ែន ពីការលក់ និងដឹកជញ្ជូនទំនិញរបស់អ៊ីរ៉ង់។

ក្រសួងរតនាគារសហរដ្ឋអាមេរិក បាននិយាយនៅក្នុងសេចក្តីថ្លែងការណ៍មួយថា កងឆ្មាំបដិវត្តន៍អ៊ីស្លាម ដែលជាកងកម្លាំងយោធាប៉ារ៉ា និងចារកម្មរបស់ប្រទេសអ៊ីរ៉ង់មួយនេះ បានគាំទ្រគម្រោងដែលពាក់ព័ន្ធនឹងបណ្តាញប្តូរប្រាក់ដ៏ស្មុគស្មាញ និងក្រុមហ៊ុននានានៅក្នុងប្រទេសជាច្រើន។

អនុរដ្ឋលេខាធិការក្រសួងរតនាគារលោក ប្រ៊េន ណែលសុន (Brian Nelson) បាននិយាយថា មូលនិធិដែលផ្តល់ដោយប្រទេសអ៊ីរ៉ង់ បានបង្កឲ្យមានការវាយប្រហារនាពេលថ្មីៗនេះដោយក្រុមឧទ្ទាមហ៊ូធី លើការដឹកជញ្ជូនពាណិជ្ជកម្មនៅក្នុងសមុទ្រក្រហម ដែលបង្កគ្រោះថ្នាក់ដល់ពាណិជ្ជកម្មអន្តរជាតិ។

ក្រុមហ៊ូធី បាននិយាយថា ពួកគេបានធ្វើការវាយប្រហារដោយយានដ្រូន និងមីស៊ីលប្រឆាំងនឹងអ៊ីស្រាអែល និងនាវាអ៊ីស្រាអែលនៅសមុទ្រក្រហម ដើម្បីជាការឆ្លើយតបទៅនឹងការវាយលុករបស់រដ្ឋជ្វីហ្វមួយនេះ ដែលបានធ្វើឡើងប្រឆាំងនឹងក្រុមហាម៉ាស នៅតំបន់ហ្កាហ្សា បន្ទាប់ពីការវាយលុកចូលទឹកដីអ៊ីស្រាអែលដោយពួកសកម្មប្រយុទ្ធហាម៉ាស កាលពីថ្ងៃទី៧ ខែតុលា ហើយអ៊ីរ៉ង់ បដិសេធថាមិនជាប់ពាក់ព័ន្ធនឹងការវាយប្រហារទាំងនោះទេ។

ទណ្ឌកម្មនេះ នឹងបង្កកទ្រព្យសម្បត្តិ និងផលប្រយោជន៍ទាំងអស់នៅក្នុងសហរដ្ឋអាមេរិក នៃអ្នកដែលជាគោលដៅទាំងនោះ ហើយជាទូទៅហាមឃាត់ជនជាតិអាមេរិក មិនឱ្យធ្វើប្រតិបត្តិការជាមួយពួកគេ៕