រុស្ស៊ី កំពុងព្យាយាមជ្រើសរើសជនអន្តោប្រវេសន៍បរទេសដែលត្រូវបានឃុំខ្លួនក្នុងការចាប់ខ្លួននាពេលថ្មីៗនេះនៅឯព្រំដែនជាមួយប្រទេសហ្វាំងឡង់ សម្រាប់ធ្វើសង្រ្គាមជាមួយអ៊ុយក្រែន។ សារព័ត៌មាន BBC បានឃើញភស្តុតាងនៃករណីជាច្រើនដែលជនបរទេសត្រូវបានបញ្ជូនយ៉ាងប្រញាប់ប្រញាល់ចូលក្នុងជំរំយោធាមួយនៅព្រំដែនជាមួយប្រទេសអ៊ុយក្រែន ប៉ុន្មានថ្ងៃបន្ទាប់ពីពួកគេត្រូវបានចាប់ខ្លួនពីបទបំពានច្បាប់អន្តោប្រវេសន៍។

ការអនុវត្តនៃការបង្ខិតបង្ខំមនុស្សនៅក្នុងមណ្ឌលឃុំឃាំងមុនពេលនិរទេសឱ្យចុះកិច្ចសន្យាសម្រាប់ការបម្រើកងទ័ពក្នុងប្រទេសអ៊ុយក្រែន មិនមែនជារឿងថ្មីនោះទេ ប៉ុន្តែតួលេខបានកើនឡើងយ៉ាងខ្លាំងនៅពេលដែលជនអន្តោប្រវេសន៍បរទេសបានមកដល់ព្រំដែន ដែលមានចំងាយ ១.៣៤០គីឡូម៉ែត្រ របស់រុស្ស៊ីជាមួយប្រទេសហ្វាំងឡង់។

ហ្វាំងឡង់បានបិទច្រកព្រំដែនជាមួយរុស្ស៊ីទាំងប្រាំបីរបស់ខ្លួនជាបណ្ដោះអាសន្ន ដោយចោទប្រកាន់ទីក្រុងមូស្គូពីបទបញ្ជូនជនអន្តោប្រវេសន៍ និងអ្នកស្វែងរកសិទ្ធិជ្រកកោននៅទីនោះ ដែលជាផ្នែកមួយនៃយុទ្ធនាការអស្ថិរភាព បន្ទាប់ពីរដ្ឋាភិបាលរដ្ឋធានី ហែលស៊ិនគី បានចូលរួមជាមួយអង្គការណាតូកាលពីដើមឆ្នាំនេះ។

ចំនួនជនអន្តោប្រវេសន៍ដ៏ច្រើនលើសលប់ដែលមិនធ្លាប់មានពីមុនមកបានចាប់ផ្តើមទៅកាន់ព្រំដែនប្រទេសហ្វាំងឡង់ និងដាក់ពាក្យសុំឋានៈជាជនភៀសខ្លួន។ អាជ្ញាធរហ្វាំងឡង់ បានចោទប្រកាន់រុស្ស៊ីថាបានលើកទឹកចិត្តដល់លំហូរនៃជនអន្តោប្រវេសន៍នេះ និងបោះបង់ចោលការត្រួតពិនិត្យទិដ្ឋាការធម្មតារបស់ពួកគេសម្រាប់អ្នកដំណើរដែលចូលក្នុងតំបន់ព្រំដែន៕