តារាសម្ដែងល្បីៗរបស់ហូលីវូដកំពុងទទួលបានផលពីការឈរជាមួយភាគីម្ខាងៗ ក្នុងសង្រ្គាមនៅតំបន់ហ្កាហ្សា ដោយសរសេរលើគណនីបណ្ដាញសង្គមរបស់ពួកគេជាមួយនឹងពាក្យស្លោក ដូចជា «ផ្ដល់សេរីភាពឲ្យប៉ាឡេស្ទីន» ឬក៏ «ខ្ញុំឈរជាមួយអ៊ីស្រាអែល» ជាដើម។

តារាសម្តែងស្រីជនជាតិអ៊ីស្រាអែល នាង Gal Gadot ដែលមានភាពល្បីល្បាញដោយសារសម្តែងក្នុងភាពយន្តរឿង «Wonder Woman» បានបង្ហាញការគាំទ្រឥតងាករេចំពោះប្រទេសខ្លួន ចាប់តាំងពីថ្ងៃទី៧ ខែតុលា ជាពេលដែលក្រុមសកម្មប្រយុទ្ធហាម៉ាស បានសម្រុកចេញយ៉ាងកំរោលពីតំបន់ហ្កាហ្សា ហើយទៅសម្លាប់មនុស្សប្រហែល ១.២០០នាក់ ដែលភាគច្រើនជាជនស៊ីវិល ព្រមទាំងបានចាប់ចំណាប់ថ្នូរប្រហែល ២៤០នាក់ទៀត។ នេះបើតាមមន្ត្រីអ៊ីស្រាអែល។

តារាសម្ដែងរូបនេះបានប្រកាសទៅកាន់អ្នកតាមដាន ក្នុងបណ្ដាញសង្គម Instagram របស់នាងចំនួន ១០៩លាននាក់ថា «ខ្ញុំឈរជាមួយអ៊ីស្រាអែល អ្នកក៏គួរតែធ្វើដូចគ្នាដែរ»។ នាងបានបន្តផ្សព្វផ្សាយ ឬចែករំលែកការបង្ហោះយ៉ាងទៀងទាត់ ដែលទាមទារឲ្យក្រុមហាម៉ាសដោះលែងជនស៊ីវិល ដែលកំពុងត្រូវបានឃុំខ្លួន ដោយការធ្វើបែបនោះទទួលបានទាំងការយល់ស្រប និងការរិះគន់។ អ្នកប្រើប្រាស់បណ្ដាញសង្គម X (ពីមុនជា Twitter) ម្នាក់ បានសរសេរឆ្លើយតបទៅនឹងការបង្ហោះរបស់នាងថា៖ «ខណៈពេលដែលអ្នកនៅជាមួយវា (បណ្ដាញសង្គម) តើអ្នកអាចប្រើវេទិការបស់អ្នកនេះ ដើម្បីចែករំលែកពីជនជាតិប៉ាឡេស្ទីនស្លូតត្រង់ ដែលបាត់ខ្លួន និងត្រូវបានសម្លាប់ផងបានទេ?»។

យោងតាមរដ្ឋបាលរបស់ក្រុមហាម៉ាស នៅតំបន់ហ្គាហ្សា បានឲ្យដឹងថា ក្នុងការសងសឹកដល់ការវាយប្រហារថ្ងៃទី៧ ខែតុលា អ៊ីស្រាអែលបានវាយលុកតំបន់ហ្កាហ្សាស្ទ្រីប និងបានបើកប្រតិបត្តិការផ្លូវគោក ដោយបានសម្លាប់មនុស្សជាង ១៧.០០០នាក់ ដែលភាគច្រើនជាស្ត្រី និងកុមារ។

គណនី Instagram របស់តារាបង្ហាញម៉ូដអាមេរិក នាង Gigi Hadid ដែលមានដើមកំណើតប៉ាឡេស្ទីន និងមានអ្នកតាមដានចំនួន ៧៩លាននាក់ មិនសូវចាប់អារម្មណ៍លើការបង្ហាញម៉ូដនោះឡើយ នៅប៉ុន្មានសប្តាហ៍ថ្មីៗនេះ។ នាងបានលើកឡើងពី «ការធ្វើបាបជាប្រព័ន្ធលើប្រជាជនប៉ាឡេស្ទីនពីសំណាក់រដ្ឋាភិបាលអ៊ីស្រាអែល»។ តែការបញ្ចេញមតិយោបល់មួយ ដោយមានអ្នកផ្សេងបញ្ចេញការយល់ឃើញស្រដៀងគ្នានេះ បានលើកឡើងថា៖ «ឈប់ផ្សព្វផ្សាយពាក្យភូតភរទៀតទៅ។ នាង និងបងប្អូនស្រីរបស់នាង គឺជាពួកប្រឆាំងជនជាតិជ្វីហ្វ»។

ដូច្នេះជារួម ឃើញថា តារាល្បីៗអាចទទួលបានការកោតសរសើរ និងការស្អប់ខ្ពើមយ៉ាងខ្លាំងក្លាពីមហាជន ជាពិសេសប្រសិនបើពួកគេបញ្ចេញមតិយោបល់លើជម្លោះនេះ៕