ក្រុមមន្ត្រី បានរាយការណ៍ថា រុស្ស៊ី បានបើកការវាយប្រហារដោយមីស៊ីលទ្រង់ទ្រាយធំប្រឆាំងនឹងអ៊ុយក្រែននៅពេលយប់ និងនៅព្រឹកថ្ងៃទី៨ ខែធ្នូ ដោយបានសម្លាប់មនុស្សយ៉ាងហោចណាស់ម្នាក់ និងរបួសយ៉ាងតិច៦នាក់។

មន្ត្រីអ៊ុយក្រែន បានព្រមានថា រុស្ស៊ីទំនងជានឹងបង្កើនការវាយប្រហារដោយមីស៊ីលប្រឆាំងនឹងទីក្រុងនានារបស់អ៊ុយក្រែន នៅពេលដែលរដូវរងា ចូលមកដល់ ដោយបង្ហាញយុទ្ធសាស្ត្ររបស់ខ្លួន កាលពីឆ្នាំមុន។

រហូតមកទល់ពេលនេះ អ្នកស្លាប់និងអ្នករងរបួសភាគច្រើន ត្រូវបានរាយការណ៍នៅក្នុងការវាយប្រហារដោយមីស៊ីលនៅពេលព្រឹករបស់រុស្ស៊ីប្រឆាំងនឹងស្រុក Pavlohrad នៃតំបន់ Dnipropetrovsk។ អភិបាលតំបន់ លោក Serhii Lysak បាននិយាយថា មនុស្សម្នាក់ បានស្លាប់ និង៤នាក់ទៀត រងរបួសក្នុងការវាយប្រហារនេះ។

អ្នករបួសទាំងនោះ ត្រូវបានគេបញ្ជូនទៅមន្ទីរពេទ្យ ដើម្បីវះកាត់។ លោក Lysak បាននិយាយថា ពួកគេពីរនាក់ ស្ថិតក្នុងស្ថានភាពធ្ងន់ធ្ងរ។

លោកអភិបាលតំបន់ បានបន្តថា សហគ្រាសឧស្សាហកម្មមួយ ផ្ទះឯកជនចំនួន ១៦ និងខ្ទមចំនួន ៥ បានរងការខូចខាត។ ព្រះវិហារមួយ និងរថយន្តមួយគ្រឿង ត្រូវបានគេរាយការណ៍ថា បានរងការខូចខាតដោយការវាយប្រហារនេះផង។