​បាល់ទាត់៖ ​ក្រុម​ព័រទុយហ្កាល់​បាន​ចាប់ផ្ដើម​យុទ្ធនា​ការ ​ការពារ​តំណែង​ជើងឯក​បាល់ទាត់​ទ្វីប​អឺរ៉ុប​របស់​ខ្លួនដោយ​យកឈ្នះ​ហុង​គ្រី ៣-០ យប់មិញ​ដោយ​គ្រាប់​បាល់ ២​គ្រាប់​របស់ Cristiano Ronaldo​។

​​មួយ​ប្រកួត​យប់មិញ​នេះដែរ​ខ្សែប្រយុទ្ធ Juventus រូបនេះ​បាន​បង្កើត​ប្រវត្តិសាស្ត្រ​ពីរ​រួចទៅហើយ និង​ខិតជិត​បំបែក​កំណត់ត្រា​ចាស់​របស់​ខ្សែប្រយុទ្ធ​អ៊ីរ៉ង់ Ali Daei ក្នុងនាម​ជា​កីឡាករ​ដែល​រក​គ្រាប់​បាល់​បាន​ច្រើន​បំផុត​អោយ​ក្រុម​ជំរើសជាតិ​។ ​​គ្រាន់តែ​ដើរចូល​ទីលាន​ប្រកួត​ទល់នឹង​ហុង​គ្រី​យប់មិញ Cristiano Ronaldo ក្លាយជា​កីឡាករ​ដំបូង​ដែល​បង្ហាញខ្លួន ​ក្នុងការ​ប្រកួត​បាល់ទាត់​ជើងឯក​ទ្វីបអឺរ៉ុប ៥​លើក​។​ ​កំណត់ត្រា​ទី​ពីរ Ronaldo ត្រូវ​រង់ចាំ​ដល់​នាទី​ទី៨៧ នៅ​ពេល​ស៊ុត​បាល់ ១១ម៉ែត្រ​អោយ​ក្រុម​ព័រទុយហ្កាល់​នាំមុខ ២-០ បន្ទាប់ពី Raphael Guerreiro បើក​ការ​នាំមុខ​នៅ​នាទី​ទី៨៤ ហើយ Ronaldo ក៏បាន​ក្លាយជា​អ្នក​ស៊ុត​បញ្ចូល​ទី​ច្រើនជាងគេ ​ក្នុង​ប្រវត្តិសាស្ត្រ​បាល់ទាត់​ទ្វីបអឺរ៉ុប​ដោយមាន​សរុប ១០គ្រាប់​នាំមុខ Michal Platini មួយ​គ្រាប់​វិញ​។

​​មិនទាន់​អស់​ទេ​អតីត​ខ្សែប្រយុទ្ធ​ក្រុម​បិសាច​ក្រហម Manchester United រូបនេះ​ក៏​រកបាន​ ១​គ្រាប់​ទៀត​នៅ​នាទី​ទី៩០+២ ដែលជា​គ្រាប់​បាល់​ទី ១១ របស់ខ្លួន​នៅ Euro​។ ​​ពីរ​គ្រាប់​យប់មិញ​នេះ​គឺជា​គ្រាប់​ទី ១០៦ របស់ Cristiano Ronaldo អោយ​ក្រុម​ជំរើសជាតិ​ព័រទុយហ្កាល់ ត្រូវការ​តែ ៣គ្រាប់​ទៀត​ដើម្បី​តាម​ស្មើ និង ៤គ្រាប់​ទៀត​ដើម្បី​បំបែក​កំណត់ត្រា​កីឡាករ​អ៊ីរ៉ង់ Ali Daei ដែល​កំពុងកាន់​កំណត់ត្រា​អ្នកស៊ុត​បញ្ចូល​ទី ​ច្រើនជាងគេ​អោយ​ក្រុម​ជំរើសជាតិ​។ ជ័យ​ជំនះ​នេះ​ធ្វើអោយ​ក្រុម​របស់លោក Fernando Santos បាន ៣​ពិន្ទុ​ដ៏​មាន​សារសំខាន់​ឈរលើ​គេ​ក្នុង​ពូ​ល F ខណៈ​ក្រុម​បារាំង​ឈរ​លេខ២ ក្រោយ​យកឈ្នះ​អាល្លឺម៉ង់ ១-០ ដោយ​បាល់​ចូល​ទី​ខ្លួន​ឯ​របស់ Mats Hummels​។ ​ប្រកួត​បន្ទាប់​ទៀត​គឺ​ព័រទុយហ្កាល់​ត្រូវ​ជួប​អាល្លឺម៉ង់ ខណៈ​ហុង​គ្រី​ជួប​បារាំង​នៅ​ថ្ងៃទី១៩ ខែមិថុនា​នេះ​៕

​អត្ថបទ​៖​នាង សុភា​វុ​ធ