​បាល់ទាត់៖ ​អ្នកចាំទី Manchester United, Dean Henderson បាន​ដក​ខ្លួន​ចេញពី​ក្រុម​ជំរើសជាតិ​អង់គ្លេស​នៅ Euro ២០២០ ហើយ​ដោយ​សារ​របួស​ត្រកៀក និង​ជំនួស​ដោយ​អ្នកចាំទី Sheffield United, Aaron Ramsdale​។ ​Dean Henderson នឹង​ត្រលប់​មកកាន់​ក្លិប Manchester United វិញ​ដើម្បី​ទទួល​ការ​ព្យាបាល​។

​​កីឡាករ​វ័យ ២៣​ឆ្នាំ Aaron Ramsdale មិនដែល​បាន​បង្ហាញ​ខ្លួន​ឲ្យ​ក្រុម​ជំរើសជាតិ​អង់គ្លេស​ឡើយ និង​ធ្លាប់​ស្ថិត​ក្នុង​បញ្ជី​កីឡាករ​ទាំង ៣៣​នាក់​ដំបូង​របស់​លោក Gareth Southgate​។ Ramsdale នឹង​បន្ត​អនុវត្ត​តាម​វិធានការ​សុខាភិបាល ​ដើម្បី​បាន​ចូល​ជំរំ​ហ្វឹកហាត់​ជាមួយ​ក្រុម​អង់គ្លេស​។​ ដូច្នេះ Aaron Ramsdale នឹង​ជា​អ្នកចាំទី​ម្នាក់​ក្នុងចំណោម ៣​នាក់​របស់​លោក Gareth Southgate បន្ទាប់ពី​អ្នកចាំទី Everton, Jordan Pickford និង​អ្នកចាំទី West Brom, Sam Johnstone​។ ​អង់គ្លេស​បាន​ចាប់ផ្ដើម Euro ២០២០ ដោយ​យកឈ្នះ​ក្រុម​ក្រូ​អាស៊ី ១-០ កាលពី​ថ្ងៃ​សៅរ៍​ដោយ​គ្រាប់​បាល់​របស់ Raheem Sterling ខណៈ​នឹង​ត្រូវ​បន្ត​ជួប​ជាមួយ​ស្កុ​ត​ឡេ​ន​ប្រកួត​ទី​២ ​ក្នុង​ពូ​ល D នៅ​ថ្ងៃ​សុក្រ​នេះ​៕

​​អត្ថបទ​៖​នាង សុភា​វុ​ធ