ភ្នំពេញ÷ នាយកដ្ឋានសារមន្ទីរ នៃអគ្គនាយកដ្ឋានបេតិកភណ្ឌ សហការជាមួយសហគមន៍សិល្បករកម្ពុជា រៀបចំកម្មវីធីពិព័រណ៍រូបគំនូរវិចិត្រកម្មចំនួន១៤ផ្ទាំង ដែលជាស្នាដៃសិល្បៈរបស់វិចិត្រករល្បីៗ ចំនួន១៤រូប មកពីសហគមន៍សិល្បករនៅក្នុងព្រះរាជាណាចក្រកម្ពុជា ក្រោមប្រធានបទ «ទេពអប្សរាមរតកខ្មែរ» ដែលប្រព្រឹត្តទៅចាប់ ពីថ្ងៃទី៩ ខែធ្នូ ឆ្នាំ២០២៣ រហូតដល់ ថ្ងៃទី៣០ ខែមករា ឆ្នាំ២០២៤។

ឯកឧត្តម ឈឹម សុធី ទីប្រឹក្សាក្រសួងវប្បធម៌ និងវិចិត្រសិល្បៈ បានថ្លែងថា ការតាំងពិព័រណ៌ក្រោមចំណងជើងថា «ទេពអប្សរាមរតកខ្មែរ» ប្រារព្ធឡើងក្នុងគោលបំណង ដោយហេតុថាសិល្បករសហសម័យមានការកើនឡើងច្រើន។ ដូច្នេះសហគមន៍សិល្បករកម្ពុជា បានផ្តួចផ្តើមរួមគ្នាបង្កើតនូវពិរព័ណ៌នេះ និងធ្វើយ៉ាងណាឲ្យមានព្រឹតិ្តការណ៍វប្បធម៌ប្រចាំឆ្នាំ និងដើម្បីចូលរួមលើកកម្ពស់ និងផ្សព្វផ្សាយស្នាដៃរបស់វិចិត្រករគំនូរវិចិត្រកម្មតាមបែបសហសម័យ ខ្មែរ និងបរទេស ជូនសាធារណជនអោយបានស្គាល់ពីគុណតម្លៃ និងទេពកោសល្យ នៃទម្រង់ក្បាច់ដ៏ល្វត់របស់របាំទេពអប្សរា ក៏ដូចជាភាពប៉ិនប្រសព្វ និងចលនាដ៏រស់រវើករបស់នាដការីខ្មែរ តាមរយៈការមើលឃើញ និងការស្វែងយល់របស់វិចិត្រករល្បីៗទាំង១៤រូបខាងលើ។

នាឱកាសនោះដែរ លោកស្រី ចាប សោភារ៉ា អនុប្រធាននាយកដ្ឋានសារមន្ទីរ សូមថ្លែងអំណរគុណ និងអបអរសាទរ ចំពោះក្រុមការងារ អ្នកតំណាងចូលរួមទាំងអស់ ដែលបានជ្រើសរើសយកសារមន្ទីរជាតិកម្ពុជា ជាកន្លែងដាក់តាំងបង្ហាញស្នាដៃសិល្បៈ និងបានចំណាយពេលវេលាដ៏មានតម្លៃរួមគ្នា រៀបចំបង្កើតអោយមានកម្មវិធីនេះឡើង។ ពិព័រណ៍មិនអចិន្ត្រៃយ៍របស់ក្រុមការងារសហគមន៍សិល្បករកម្ពុជានៅពេលនេះ នឹងបង្ហាញជូនអ្នកទស្សនាបានស្វែងយល់អំពី ទេពកោសល្យ ការច្នៃប្រឌិត សោភ័ណភាព និងភាពឥតខ្ចោះនៃស្នាដៃ ព្រមទាំងផ្នត់ គំនិតរបស់សិល្បករ តាមរយៈស្នាដៃសិល្បៈចម្រុះសហសម័យដ៏ផ្ចិតផ្ចង់ផ្អែកលើសាច់រឿង និងភាពទាក់ទាញរបស់ទេពអប្សរ។

តាងនាមឲ្យលោកប្រធាននាយកដ្ឋានសារមន្ទីរ លោកស្រី ពិតជារីករាយ និងស្វាគមន៍ការតាំងពិព័រណ៍សិល្បៈគំនូរសហសម័យខ្មែរនៅសារមន្ទីរជាតិកម្ពុជា។ នេះជាឱកាសដ៏វិសេសវិសាលមួយ ក្នុងការបង្ហាញទេពកោសល្យរបស់សិល្បករជាច្រើន នៅកម្ពុជា។ សូមលើកទឹកចិត្ត និងជម្រុញឲ្យមានការបង្ហាញស្នាដៃសិល្បៈកាន់តែសំបូរបែប។ ជឿជាក់ថា ការងារ នេះនឹងបង្កើតទំនាក់ទំនងល្អជាមួយស្ថាប័នដែលពាក់ព័ន្ធ ធ្វើការរួមគ្នាក្នុងការលើកស្ទួយវិស័យនេះឲ្យមានសកម្មភាពកាន់តែ ទូលំទូលាយ និងជាឱកាសជម្រុញឲ្យមានកម្មវិធីប្រកួតស្នាដៃសិល្បៈគំនូរវិចិត្រកម្មជាសាធារណសម្រាប់សិល្បករជំនាន់ក្រោយ នាអនាគតខាងមុខ៕

  អត្ថបទ រដ្ឋា