ប្រទេសហ្វីលីពីន និងចិន បានចោទដាក់គ្នាទៅវិញទៅមកកាលពីថ្ងៃអាទិត្យ ១០ ធ្នូ ជុំវិញ​ការ​ប៉ះទង្គិច​នាវារវាងប្រទេសទាំង២នៅជិតតំបន់ជម្លោះក្នុងសមុទ្រចិនខាងត្បូង ស្របពេល​ភាពតាន​តឹង​ដែលចេះតែកើនឡើងខ្លាំង លើការអះអាងសិទ្ធិគ្រប់គ្រងផ្លូវទឹកដ៏សំខាន់។

អង្គភាពឆ្មាំសមុទ្រហ្វីលីពីនបានចោទប្រកាន់ប្រទេសចិនថា បានបាញ់កាណុងបាញ់ទឹក និងបើក​បំបុក​នាវាផ្គត់ផ្គង់ឡើងវិញ និងនាវាឆ្មាំសមុទ្រ បណ្តាលឱ្យខូចខាតម៉ាស៊ីនយ៉ាងធ្ងន់ធ្ងរ ខណៈ​កង​កម្លាំង​ឆ្មាំ​សមុទ្ររបស់ចិនបាននិយាយថា នាវាហ្វីលីពីន មានចេតនាបើកបំបុកនាវារបស់ខ្លួន។ 

ប្រទេស​ចិនអះអាងសិទ្ធិគ្រប់គ្រងស្ទើរតែទាំងស្រុងនៅសមុទ្រចិនខាងត្បូង ដែលជា​ផ្លូវ​ទឹក​សម្រាប់​ពាណិជ្ជក​ម្មប្រចាំឆ្នាំមានទំហំជាង ៣ ពាន់ពាន់លានដុល្លារអាមេរិក រួមទាំងផ្នែក​ដែល​អះអាង​សិទ្ធិ​ដោយ​ប្រទេសហ្វីលីពីន វៀតណាម ឥណ្ឌូនេស៊ី ម៉ាឡេស៊ី និងប្រ៊ុយណេ។ តុលាការអាជ្ញាកណ្តាលអចិន្ត្រៃយ៍ក្នុងឆ្នាំ ២០១៦ បាននិយាយថា​ ការ​អះអាង​សិទ្ធិ​របស់​ចិន​ពុំ​មាន​មូល​ដ្ឋាន​ផ្លូវច្បាប់ទេ។

ទីក្រុងប៉េកាំង និងម៉ានីល បាននិងកំពុងលេងឆ្មាចាប់កណ្ដុរជុំវិញតំបន់ថ្មប៉ប្រះទឹកមានជម្លោះ Second Thomas Shoal ដែលគ្មានមនុស្សរស់នៅ ក្នុងតំបន់​សេដ្ឋកិច្ច​ផ្តាច់​មុខ​របស់​ប្រទេស​ហ្វីលីពីន នៅពេលដែល​ហ្វីលីពីន​ដាក់​ពង្រាយ​បេសកកម្ម​ផ្គត់ផ្គង់​ឡើង​វិញ​ សម្រាប់​ទាហាន​ហ្វីលីពីន ដែលរស់នៅលើនាវាចម្បាំងដ៏ចំណាស់មួយក្នុងសម័យសង្រ្គាម ដែល​បាន​ចត​ទុក​នៅ​ទីនោះ​ក្នុ​ងឆ្នាំ១៩៩៩ ដើម្បីការពារការទាមទារដែនសមុទ្ររបស់ទីក្រុងម៉ានីល។

តំបន់ថ្ម​ប៉ប្រះទឹកគឺជាផ្នែកមួយនៃអ្វីដែលត្រូវគេស្គាល់ជាអន្តរជាតិថាជាកោះស្ព្រាតលី(Spratly)

នៅក្នុង​ឧបទ្ទវហេតុកាលពីថ្ងៃអាទិត្យ អង្គភាព​ឆ្មាំសមុទ្រ​របស់​ប្រ​ទេស​ចិន​បាន​និយាយ​នៅ​ក្នុង​សេចក្តីថ្លែង​ការណ៍មួយថា នាវាហ្វីលីពីនពីរគ្រឿង ដោយមិនអើពើនឹង​ការ​ព្រមាន​ម្តង​ហើយ​ម្តង​ទៀត​បាន ចូលដោយខុសច្បាប់ទៅក្នុងដែនទឹក ដែលនៅជាប់នឹងថ្មប៉ប្រះទឹករិនណៃ(Ren'ai) ក្នុងប្រជុំកោះណានសា (Nansha) ដោយគ្មានការអនុញ្ញាតពីរដ្ឋាភិបាលចិន៕