អគ្គិភ័យនៅក្នុងជំរំមួយដែលជាកម្មសិទ្ធិរបស់ចលនាកម្មករគ្មានដី (MST) របស់ប្រេស៊ីល នៅភាគខាងជើងរដ្ឋប៉ារ៉ា បានសម្លាប់មនុស្ស ៩នាក់ និងបណ្ដាលឲ្យមនុស្ស ៨នាក់ រងរបួសកាលពីយប់ថ្ងៃសៅរ៍ នេះបើយោងក្រុមចលនានេះបាននិយាយកាលពីថ្ងៃអាទិត្យ (១០ ធ្នូ)។

យោងតាមសារព័ត៌មានទីភ្នាក់ងារចលនាកម្មករ MST បានឱ្យដឹងថា ឧបទ្ទវហេតុនេះបណ្តាលមកពីទុស្សេខ្សែភ្លើងនៅក្នុងបណ្តាញអគ្គិសនីអំឡុងពេលដំឡើងខ្សែភ្លើងអ៊ីនធឺណិត នៅក្នុងជំរំកសិករជនបទដែលមានទីតាំងនៅទីក្រុង ប៉ារ៉ាអ័រប៉េបាស (Parauapebas)។

ក្រុមអ្នកដឹកនាំសហគមន៍បានប្រាប់សន្និសីទសារព័ត៌មានថា ទុស្សេខ្សែភ្លើងនោះបានកើតឡើងនៅម៉ោងប្រហែល ៨យប់ (ម៉ោងក្នុងស្រុក) នៅពេលដែលអង់តែនប៉ះបណ្តាញតង់ស្យុងខ្ពស់ បណ្ដាលឲ្យភ្លើងឆេះទៅរកខ្សែថាមពល និងខ្ទមមួយចំនួននៅក្នុងជំរំ។

ក្នុងចំណោមអ្នកស្លាប់ ៩នាក់នោះមានមនុស្ស ៦នាក់ ជាអ្នករស់នៅក្នុងជំរំ និង៣នាក់ ជាកម្មករមកពីក្រុមហ៊ុនអ៊ីនធឺណិត។ មនុស្ស ៨នាក់ផ្សេងទៀតដែលបានរងរបួសត្រូវបានបញ្ជូនទៅមន្ទីរពេទ្យ ក្នុងនោះមនុស្ស ៧នាក់បានចេញពីមន្ទីរពេទ្យ ហើយម្នាក់ទៀតកំពុងសម្រាកព្យាបាលដោយមានការរលាកកម្រិតទី២ ប៉ុន្តែមិនមានគ្រោះថ្នាក់ដល់ជីវិតនោះទេ៕