​បាល់ទាត់៖ បន្ទាប់ពី​រក​ឃើញ​បេក្ខភាព ១២​ក្រុម​ត្រូវ​ឡើង​ជុំ​ទី​៣ នៃ​វគ្គ​ជម្រុះ​ពានរង្វាន់​បាល់ទាត់​ពិភព​លោក FIFA World Cup 2022 និង​ជា​បេក្ខភាព​ឡើង​ជុំ​ចុងក្រោយនៃ​ពានរង្វាន់​ជើងឯក​អាស៊ី​ឆ្នាំ​២០២៣ AFC Asian Cup China 2023 នៅ​ប្រទេស​ចិន សហព័ន្ធ​កីឡាបាល់ទាត់​ទ្វីប​អាស៊ី​ (AFC) បាន​ធ្វើ​ការកំណត់​រូប​មន្ដ​ប្រកួត​វគ្គ​ជម្រុះ​ជុំ​ទី​៣ នៃ​ពានរង្វាន់​ទ្វីប​អាស៊ី​នេះ​រួចហើយ ខណៈ​ក្រុម​ជម្រើស​ជាតិ​កម្ពុជាត្រូវ​ឆ្លងកាត់​ការប្រកួត Play-Off ដើម្បី​ប្រជែង​កៅអី​វគ្គ​ជម្រុះ​ជុំ​ទី​៣ នេះ។​

​គួរ​បញ្ជាក់​ថា ក្រោយ​បញ្ចប់​ការប្រកួត​ជម្រុះ​ជុំ​ទី​២ នៃ​ពានរង្វាន់​បាល់ទាត់​ពិភពលោកឆ្នាំ​២០២២ និង​ពានរង្វាន់​ជើងឯក​អាស៊ីឆ្នាំ​២០២៣ ក្រុម​លេខ​១ នៃ​ពូ​ល​ទាំង ៨ និង​ក្រុម​លេខ​២ ល្អ​ជាងគេ ៥​ក្រុមបាន​កក់​កៅអី​ជុំ​ទី​៣ និង​ជុំ​ចុងក្រោយនៃ​ពានរង្វាន់​ទាំងពីរ។ ចំណែក​ក្រុម​នៅ​សល់ រួមមាន​ក្រុម​លេខ​២ អន់​បំផុស ៣​ក្រុម​, ក្រុម​លេខ​៣ និង​ក្រុម​លេខ​៤ នៃ​ពូ​ល​នីមួយៗ​សរុប ១៦​ក្រុម និង​ក្រុម​លេខ​៥ ល្អ​បំផុត ៣​ក្រុមត្រូវ​ឈរ​ចាំ​ក្នុង​ជុំ​ទី​៣ នៃ​ការប្រកួត​ជម្រុះ​ជើង​ឯក​អាស៊ី។​ ​ដោយឡែក​ក្រុម​លេខ​៥ អន់​បំផុតរួមមាន​ក្រុម​ជម្រើស​ជាតិ​ឥណ្ឌូនេស៊ី កម្ពុជា ឆាយ​នី​ស​តៃប៉ិ និង​ក្រុម​កោះ​ហ្គាំ ត្រូវ​លេង Play-Off ដើម្បី​ប្រជែង​កៅអី​បង្គ្រប់​ជុំ​ទី​៣ នៃ​ការប្រកួត​ជម្រុះ​ជើងឯក​ទ្វីប​អាស៊ីដែល​មាន ២២​ក្រុម​កំពុង​ឈរ​ចាំ។ ប៉ុន្តែ​តាមរយៈ​ចំណាត់ថ្នាក់​ក្នុង​ការ​ប្រកួត​ជម្រុះ​ជុំ​ទី​២ ក្នុងចំណោម​បេក្ខភាព ៤​ក្រុមត្រូវ​លេង Play-Off ឥណ្ឌូនេស៊ី និង​កម្ពុជា​ឈរ​លេខ​១ និង​លេខ​២ ស្ថិត​ក្នុង Pot-1 ខណៈ​ក្រុម​ឆាយ​នី​ស​តៃប៉ិ និង​កោះ​ហ្គាំឈរ​លេខ​៣ និង​លេខ​៤ ស្ថិតក្នុង Pot-2។​

​ដោយ​ហេតុ​នេះ​សហព័ន្ធ​កីឡាបាល់ទាត់​ទ្វីប​អាស៊ី នឹង​រៀបចំ​ការ​ចាប់​ឆ្នោត​ដើម្បី​ប្រកួត​វគ្គ Play-Off នា​ពេល​ឆាប់ៗ​ខាងមុខ ដោយ​កម្ពុជា​អាច​នឹង​ត្រូវ​ជួប​ក្រុម​ឆាយ​នី​ស​តៃប៉ិ ឬ​កោះ​ហ្គាំ។ ចំពោះ​កាល​បរិច្ឆេទ​ប្រកួត Play-Off គ្រោង​ប្រកួត​ជើង​ទី​១ នា​ថ្ងៃ​ទី​៧ ខែ​កញ្ញា និង​ជើង​ទី​២ ប្រកួត​នា​ថ្ងៃ​ទី​១២ ខែ​តុលា ឆ្នាំ​២០២១ ខាងមុខ។ សម្រាប់​ក្រុម​ទទួល​បាន​ជ័យជម្នះ​ក្នុង​ការ​ប្រកួត​នេះ នឹង​ឡើង​ទៅ​បង្គ្រប់​កៅអី ២៤​ក្រុមនៃ​ជុំ​ទី​៣ ដើម្បី​បន្ដ​ការប្រកួត​ជម្រុះ និង​ដណ្ដើម​កៅអី​ជុំ​ចុងក្រោយនៃ​ពានរង្វាន់​ជើងឯក​ទ្វីប​អាស៊ី​ឆ្នាំ​២០២៣។​ ​គួរ​បញ្ជាក់​ថា ចំពោះ​ការប្រកួត​ជម្រុះ​ជុំ​ទី​៣ នៃ​ព្រឹត្តិការណ៍​បាល់ទាត់​ប្រចាំ​ទ្វីប​អាស៊ី ៤​ឆ្នាំ​ម្ដងនេះ​នឹង​ត្រូវ​បែងចែក​ជា ៦​ពូ​ល ក្នុង​មួយ​ពូ​ល​មាន ៤​ក្រុម​ដើម្បី​ធ្វើការ​ប្រកួត​សន្សំ​ពិន្ទុ​ចាប់ពី​ថ្ងៃ​ទី​១ ខែ​កុម្ភៈរហូតដល់​ថ្ងៃ​ទី​២៧ ខែ​កញ្ញា ឆ្នាំ​២០២២ ដើម្បី​ចម្រាញ់​រក​ក្រុម​ខ្លាំង ១​ក្រុម​ឡើង​ទៅ​បង្គ្រប់​កៅអី​ជុំ​ចុងក្រោយ នៃ​ពានរង្វាន់​ជើងឯក​អាស៊ី​ឆ្នាំ​២០២៣ នៅ​ចិន។ សម្រាប់​ក្រុម​ដែល​មាន​សិទ្ធ​ឡើង​ជុំ​ចុងក្រោយ​នេះគឺ​ក្រុម​ឈរ​លេខ​១ នៃ​ពូ​ល​ទាំង ៦ និង​ក្រុម​លេខ​២ ល្អ​ជាងគេ​ចំនួន ៥​ក្រុម។ រីឯ​ការប្រកួត​ជុំ​ចុងក្រោយនៅ​ចិនគ្រោង​ធ្វើឡើង​ពី​ថ្ងៃ​ទី​១៦ ខែ​មិថុនា​រហូតដល់​ថ្ងៃ​ទី​១៦ ខែ​កក្កដា ឆ្នាំ​២០២៣ ខាងមុខ៕

​អត្ថបទ៖ លី ឈុន​ឡា