យន្តហោះរបស់ប្រធានាធិបតីចិនលោក ស៊ី ជីនពីង (Xi Jinping) បានចុះចតនៅទឹកដីរបស់ប្រទេសវៀតណាមហើយ នៅថ្ងៃអង្គារ (ទី១២ ខែធ្នូ) នេះ ដោយនេះជាដំណើរទស្សនកិច្ចលើកដំបូងរបស់មេដឹកនាំកំពូលរបស់ប្រទេសមហាអំណាចសេដ្ឋកិច្ចមួយរបស់ពិភពលោក ក្នុងរយៈពេល ៦ឆ្នាំ ខណៈដែលលោកប្រឹងប្រែងទប់ទល់នឹងឥទ្ធិពល ដែលកំពុងកើនឡើងជាលំដាប់របស់សហរដ្ឋអាមេរិកជាមួយប្រទេសកុម្មុយនីស្តមួយនេះ។

អំឡុងទស្សនកិច្ចនេះ លោក ស៊ី នឹងជួបជាមួយមេដឹកនាំបក្សកុម្មុយនីស្ត ដែលកំពុងកាន់អំណាចរបស់វៀតណាម គឺលោក Nguyen Phu Trong ដែលជំនួបនេះ បានកើតឡើងបន្ទាប់ពីទីក្រុងហាណូយ បានបង្កើនទំនាក់ទំនងការទូតជាមួយទីក្រុងវ៉ាស៊ីនតោន នៅពេលដែលប្រធានាធិបតីអាមេរិកលោក ចូ បៃដិន (Joe Biden) បានធ្វើទស្សនកិច្ចកាលពីខែកញ្ញា។

អ្នកនាំពាក្យក្រសួងការបរទេសចិន លោក Wang Wenbin បាននិយាយថា ដំណើរទស្សនកិច្ចនេះ នឹងពាក់ព័ន្ធនឹងការពិភាក្សាស្តីពី «ការធ្វើឲ្យទំនាក់ទំនងចិន-វៀតណាម ឡើងដល់កម្រិតកាន់តែខ្ពស់»។

ទស្សនកិច្ចនោះ អាចឃើញថា លោក ស៊ី នឹងជំរុញឲ្យវៀតណាមចូលរួមជាមួយ «សហគមន៍នៃជោគវាសនារួម» របស់លោក ជាឃ្លាដែលបានកំណត់យ៉ាងច្បាស់លាស់ ដែលសំដៅទៅលើចក្ខុវិស័យនៃកិច្ចសហប្រតិបត្តិការនាពេលអនាគតលើបញ្ហាសេដ្ឋកិច្ច សន្តិសុខ និងនយោបាយ។

នៅថ្ងៃពុធ (ទី១៣ ខែធ្នូ) លោក ស៊ី នឹងជួបពិភាក្សាជាមួយនាយករដ្ឋមន្ត្រីវៀតណាម លោក Pham Minh Chinh និងប្រធានាធិបតីលោក Vo Van Thuong ហើយនឹងដាក់កម្រងផ្កានៅវិមានរបស់មេដឹកនាំបដិវត្តន៍ លោក ហូ ជីមិញ (Ho Chi Minh)។

ដំណើរទស្សនកិច្ចនេះ ក៏បានកើតឡើងផងដែរ ស្របពេលមានការកើនឡើងនូវភាពតានតឹង រវាងចិន និងហ្វីលីពីន នៅសមុទ្រចិនខាងត្បូង បន្ទាប់ពីមានការប្រឈមមុខដាក់គ្នា រវាងនាវារបស់ប្រទេសទាំង២ នៅតំបន់ថ្មប៉ប្រះទឹក។ ហើយវៀតណាម រួមជាមួយម៉ាឡេស៊ី ប្រ៊ុយណេ និងកោះតៃវ៉ាន់ ក៏មានការទាមទារត្រួតស៊ីគ្នា នៅសមុទ្រចិនខាងត្បូងដែរ៕