ហ្កាហ្សា ៖ មន្ត្រីទីភ្នាក់ងារអឌ្ឍចន្ទក្រហមម្នាក់បាននិយាយថា ក្បួនរថយន្តជំនួយចំនួន ៨០គ្រឿងសម្រាប់តំបន់ហ្កាហ្សា ត្រូវបានបញ្ជូនពីប្រទេសអេហ្ស៊ីបទៅកាន់ច្រកឆ្លងកាត់ កេរឹម សាលូម (Kerem Shalom) ដើម្បីត្រួតពិនិត្យកាលពីថ្ងៃអង្គារ (១២ ធ្នូ) បន្ទាប់ពីប្រព័ន្ធត្រួតពិនិត្យថ្មីត្រូវបានបើកក្នុងកិច្ចខិតខំប្រឹងប្រែងដើម្បីពន្លឿនការផ្តល់ជំនួយ។

ចាប់តាំងពីការផ្តល់ជំនួយបានចាប់ផ្តើមនៅថ្ងៃទី២០ ខែតុលា មកការផ្គត់ផ្គង់ដែលចូលដល់តំបន់ហ្កាហ្សា ពីប្រទេសអេហ្ស៊ីប ត្រូវតែធ្វើដំណើរទៅភាគខាងត្បូងពីទីក្រុង រ៉ាហ្វាហ្វ ដើម្បីត្រួតពិនិត្យនៅច្រកឆ្លងកាត់ អាល់អាវចា នីតហ្ស៊ាណា (Al-Awja-Nitzana) នៅតាមព្រំដែននៃប្រទេសអេហ្ស៊ីបជាមួយប្រទេសអ៊ីស្រាអែល ជាដំណើរការដែលបណ្តាលឱ្យមានការកកស្ទះ និងការពន្យារពេល។

ការប្រើប្រាស់ច្រកឆ្លងកាត់ កេរឹម សាលូម ថ្មីដែលស្ថិតនៅលើព្រំដែនរវាងអ៊ីស្រាអែល ហ្កាហ្សា និងអេហ្ស៊ីប ប្រហែល ៣គីឡូម៉ែត្រ ពីទីក្រុង រ៉ាហ្វាហ្វ អាចអនុញ្ញាតឱ្យដំណើរការរថយន្តដឹកទំនិញបន្ថែមទៀត រួមទាំងរថយន្តជំនួយមួយចំនួនដែលនឹងមកពីហ្ស៊កដានីជាលើកដំបូងចាប់តាំងពីការចាប់ផ្តើមនៃសង្រ្គាមនៅហ្កាហ្សាមក នេះបើយោងតាមក្រុមមន្ត្រីជំនួយ។

នៅពេលដែលស្ថានការណ៍មនុស្សធម៌កាន់តែមានភាពអស់សង្ឃឹមនៅក្នុងតំបន់ហ្កាហ្សា អង្គការសហប្រជាជាតិបាននឹងកំពុងជំរុញឱ្យអ៊ីស្រាអែល អនុញ្ញាតឱ្យរថយន្តដឹកទំនិញចូលទៅកាន់តំបន់ហ៊ុមព័ទ្ធនោះដោយផ្ទាល់ពីច្រកឆ្លងកាត់ កេរឹម សាលូម ដោយនិយាយថាការធ្វើបែបនោះនឹងជួយដល់ស្ថានភាពនៅតំបន់ហ្កាហ្សាយ៉ាងខ្លាំង៕