​

ពោធិ៍សាត់៖ សំណល់ប្លាស្ទិកអាចបង្កផលប៉ះពាល់អវិជ្ជមានដល់បរិស្ថានជុំវិញ ជីវជម្រុះ សុខភាពមនុស្ស ក៏ដូចជាសេដ្ឋកិច្ចរបស់ប្រទេសជាតិ ហើយបញ្ហាធំបំផុតរបស់ប្លាស្ទិក គឺវាត្រូវការពេលយូរខ្លាំងដើម្បីពុកផុយ ខ្លះអាចចំណាយពេលរាប់ពាន់ឆ្នាំ។ សារធាតុប្លាស្ទិកទំាងនោះមិនបានរលាយទៅណាទេ វាគ្រាន់តែបំបែកខ្លួនទៅជាកំទិចប្លាស្ទិកតូចៗតែប៉ុណ្ណោះ។ កំទិសប្លាស្ទិកទំាងនោះបានបង្កហានិភ័យដោយបញ្ចេញសារធាតុគីមីពុលនៅពេលបំបែកខ្លួន ហើយបានបំពុលបរិស្ថាន សម្លាប់សត្វ និងធ្វើឲ្យប៉ះពាល់ដល់សុខភាពមនុស្ស។ ដូចនេះទើបរាជរដ្ឋាភិបាលកម្ពុជា បានយកចិត្តទុកដាក់ខ្លាំងក្នុងការដោះស្រាយបញ្ហានេះ ជាពិសេសគឺជម្រុញអោយប្រជាពលរដ្ឋ ចូលរួមអនុវត្តវិធីសាស្រ្តចំនួន៤ ក្នុងការកាត់បន្ថយ

ប្លាស្ទិក គឺ(បដិសេធ កាត់បន្ថយ ប្រើប្រាស់ឡើងវិញ និង កែច្នៃឡើងវិញ)។

ក្នុងនោះដែរសម្រាប់សាលាអនុវិទ្យាល័យពោធិ៍សាត់ ស្ថិតក្នុងក្រុងពោធិ៍សាត់ បានអនុវត្តន៍បានជោគជ័យ យ៉ាងល្អប្រសើរ តាមគោលការណ៍ណែនាំរបស់ក្រសួងអប់រំយុវជននិងកីឡា រួមនិងក្រសួងបរិស្ថាន ក្នុងការលើកំពស់សុវត្ថិភាពចំណីអាហារ និងការកាត់បន្ថយការប្រើប្លាស្ទិកនៅតាមសាលារៀន ជាពិសេសគឺការបញ្ជ្រាបនូវផ្នត់គំនិតការយល់ដឹងអំពីបញ្ហាប្លាស្ទិក និងការស្រាលាញ់បរិស្ថានដល់សិស្សានុសិស្សដែលជាមនុស្សនៅវ័យក្មេង ។

លោក បេង ឆវីរៈ នាយកអនុវិទ្យាល័យពោធិ៍សាត់ បានអោយដឹងថា ក្នុងអនុវិទ្យាល័យពោធិ៍សាត់បានបញ្ឈប់ការលក់នំកញ្ចប់ ដោយប្តូរមកលក់ជានំខ្មែរហើយដាក់អោយប្រើស្លឹកចេកជំនួសអោយ​ការប្រើថង់ប្លាស្ទិកសម្រាប់ខ្ចប់នំ ជាពិសេសនោះគឺតម្រូវអោយសិស្សានុសិស្ស ត្រូវប្រើប្រអប់បាយ ស្លាបព្រានិងដប់ទឹកផ្ទាល់ខ្លួន ជំនួសអោយការប្រើប្រអប់ស្នោ ស្លាបព្រាជ័រ និងកែវជ័រដប់ជ័រ។ តាមកិច្ចសម្ភាសន៍ជាមួយសិស្សានុសិស្សក្នុងអនុវិទ្យាល័យពោធិ៍សាត់ ពួកគាត់ពិតជាមានការយល់ដឹងអំពីបញ្ហាប្លាស្ទិកនិងបរិស្ថាន ហើយរីករាយក្នុងការចូលរួមអនុវត្តន៍ការកាត់បន្ថយការប្រើប្លាស្ទិក ដើម្បីសុខភាព បរិស្ថាន សោភ័ណ្ឌភាពក្នុងសាលា និងសង្គមជាតិ ។

សូមបញ្ជាក់ដែរថា បច្ចុប្បន្នអនុវិទ្យាល័យពោធិ៍សាត់ មានសិស្សានុសិស្សសរុបចំនួនប្រមាណ ១៨០០នាក់ បើក្នុងមួយថ្ងៃពួកគាត់មិនប្រើថង់ប្លាស្ទឹកគ្រប់គ្នា គឺមានន័យថាពួកគាត់បានចូលរួម​កាត់បន្ថយការប្រើថង់ប្លាស្ទិកឬប្រអប់ស្នោ បានចំនួនប្រមាណ ១៨០០ដែរក្នុង ១ថ្ងៃ ដូចនេះបើក្នុងរយៈពេល ១ឆ្នាំពួកគាត់នឹងជួយកាត់បន្ថយសំណល់ថង់ប្លាស្ទិកឬប្រអប់ស្នោបានរាប់សិបម៉ឺន ផងដែរ ៕ អត្ថបទ៖ ភិរុណ ពៅ