ភ្លៀងធ្លាក់យ៉ាងខ្លាំង នៅតំបន់ហ្កាហ្សាភាគខាងត្បូង នៅថ្ងៃពុធ (ទី១៣ ខែធ្នូ) នេះ បាននាំមកនូវភាពអស់សង្ឃឹម និងទុក្ខលំបាកបន្ថែមទៀតដល់អ្នកផ្លាស់ទីលំនៅប៉ាឡេស្ទីន ដែលកំពុងនាំគ្នាជ្រកកោនក្នុងជំរុំតង់មួយនៅតំបន់ព្រំដែន Rafah។

ដោយឈរក្បែរតង់ ដែលគាត់ស្នាក់នៅ ពោលគឺមិនអ្វី ក្រៅពីក្រណាត់នីឡុងរហែកគ្របពីលើតង់នោះ លោក Ramdan Mohadad បាននិយាយថា៖ «ពួកយើងកំពុងលិចលង់ដោយទឹកភ្លៀង»។ ហើយគាត់ និងប្រជាជនប៉ាឡេស្ទីនផ្សេងទៀត ដែលត្រូវផ្លាស់ទីលំនៅ បាននិយាយអំពីការខ្វះខាតខោអាវរងា ភួយ និងការការពារពីទឹកភ្លៀង។ អ្នកផ្លាស់ទីលំនៅម្នាក់ទៀត ឈ្មោះ Neda Sokar បាននិយាយថា៖ «ពេលមានភ្លៀង ខ្ញុំមិនដឹងថា ត្រូវធ្វើអ្វី ឬត្រូវទៅណាទេនោះឡើយ»។

ការវាយប្រហាររបស់អ៊ីស្រាអែលលើតំបន់ហ្កាហ្សា ដើម្បីកម្ចាត់ក្រុមហាម៉ាស បានសម្លាប់ប្រជាជនប៉ាឡេស្ទីនយ៉ាងហោចណាស់ ១៨.២០៥នាក់ហើយ ក្នុងនោះរួមទាំងកុមារជាច្រើននាក់ និងបានធ្វើឲ្យមានអ្នករងរបួសជិត ៥០.០០០នាក់ គិតចាប់តាំងពីថ្ងៃទី៧ ខែតុលាមក។ នេះបើយោងតាមក្រសួងសុខាភិបាល នៅតំបន់ហ្កាហ្សា។

ហើយបើយោងតាមអង្គការសហប្រជាជាតិ និងក្រសួងសុខាភិបាលតំបន់ហ្កាហ្សា ជម្លោះនេះក៏បាននាំមានភាពអត់ឃ្លានផងដែរ ដោយបានធ្វើឲ្យប្រជាជន ៨៥ភាគរយ ចាកចេញពីផ្ទះសម្បែងរបស់ពួកគេ ព្រមទាំងបណ្ដាលឲ្យមានជំងឺឆ្លងរីករាល៕