កំពង់ឆ្នាំង៖ លោក ហ៊ីង ភ័ព្វមីនា អភិបាលក្រុងកំពង់ឆ្នាំង នៅព្រឹកថ្ងៃទី១៤ ខែធ្នូ ឆ្នាំ២០២៣នេះ បាន​អំពាវនាវដល់អាជីវករដែលកំពុងតាំងលក់សម្ភារៈនានានៅតាមខឿនការ៉ូឡា និងតាមផ្លូវ​ចាប់​ពី​ចំណុច​ខាងជើងវត្តយាយទេព រហូតដល់ ចំណុចចុងកោះ សង្កាត់ផ្សារឆ្នាំង ក្រុងកំពង់ឆ្នាំង ត្រូវ​ចូល​រួម​សហការជាមួយអាជ្ញាធរមានសមត្ថកិច្ច ក្នុងការ​រៀបចំ​សណ្តាប់​ធ្នាប់​តាម​ដង​ផ្លូវ​ទាំ​ង​នេះ​អោយ​បាន​ល្អស្អាត មុនរដ្ឋបាលក្រុងកំពង់ឆ្នាំងចាត់វិធានការណ៍រដ្ឋបាល ព្រោះផ្លូវនេះ ជា​ផ្លូវ​ទេសចរ​ជាតិ-អន្តរជាតិឡើងចុះ រៀងរាល់ថ្ងៃ ។

លោក ហ៊ីង ភ័ព្វមីនា អភិបាលក្រុងបានបន្តថា៖ នៅចំណុចចាប់ពីខាងជើហវត្តយាយទេព ដល់​ចំណុច​ចុង​កោះ សង្កាមត់ផ្សារឆ្នាំង ក្រុងកំពង់ឆ្នាំង អាជីវករ​ដែល​មាន​តូប​លក់​ដូរ​នៅ​តាម​បណ្តោយ​ផ្លូវ​នេះ បានយកខឿនការ៉ូឡា និងផ្លូវថ្នល់ មកតាំងលក់នូវ​របស់​របរ​ដូច​ជា​លក់​ឈើ​បង្គោល ​លក់ត្រីសាច់ លក់ខោអាវ ម៉ាស៊ីន ធុងស្នោ ថ្នាំនិងចំណីសត្វ និងចាប់ហួយនានា រួមទាំង​បាន​ដាក់​របស់របរចោលតាមផ្លូវ មិនមានសោភ័ណភាព និងអនាម័យឡើយ។ ចំណែកសំរាមវិញ បាន​ហោះហើរពេញផ្លូវ និងមានក្លិនស្អុយមកលើអ្នកធ្វើដំណើរទៀតផង។ ករណីទាំងនេះ លោក​អភិបាល​ក្រុង​បានសំណូមពរដល់អាជីវករទាំងអស់ ត្រូវចូលរួម​ទាំង​អស់​គ្នា​ក្នុង​ការ​រៀបចំ​សណ្តាប់​ធ្នាប់ អនាម័យ សោភ័ណភាព តាមដងផ្លូវនេះជាបន្ទាន់ មុនរដ្ឋបាលក្រុងកំពង់ឆ្នាំង ចាត់​វិធានការ​រដ្ឋបាល​លើ​ទីតាំង​ទាំងអស់នោះ ។ ការចូលរួមចំណែកក្នុង​ការរៀបចំ​សណ្តាប់​ធ្នាប់​របស់​បង​ប្អូន​អាជីវករ គឺការជួយជីវភាពខ្លួនឯង ជួយសុខភាពខ្លួនឯង និងបានជួយ​រួម​ចំណែក​ក្នុង​កា​រ​ថែ​រក្សា​អនាម័យ សោភ័ណភាពក្រុងខេត្តរបស់យើងផងដែរ។

កន្លងមក នៅចំណុចទីទួលសុវត្ថិភាពដើមស្រល់មុខវត្តយាយទេព ត្រូវបានអាជ្ញាធរខេត្ត រួម​និង​សមត្ថកិច្ច បានចុះរុះរើចេញអស់ហើយ ដោយទីតាំងនោះមានភាពអនាធិបតេយ្យខ្លាំង ។ ស្រាប់​តែរយៈ​ពេល​ប៉ុន្មានខែចុងក្រោយនេះ គេឃើញមានអ្នកលក់ដូរទាំងនោះ បានយករបស់របរ​របស់​ខ្លួន ​ទៅដាក់ចោលនៅចំណុចទីទួលសុវត្ថិភាពនោះដដែល ។ ករណីនេះ បានធ្វើ​អោយ​អោយ​មាន​ភាព​អនាធិបតេយ្យចាប់ពីមុខវត្តយាយទេព រហូតដល់ផ្លូវចុះទំនប់បារាំង និងមានសំរាមជាច្រើន​មិន​​មាន​អ្នក​ប្រមូលនោះឡើយ៕ អត្ថបទ៖ កាំង ហុងវាស្នា