សាកលវិទ្យាល័យវិទ្យាសាស្ត្រសុខាភិបាល (ស.វ.ស) នៃក្រសួងសុខាភិបាល បានរៀបចំពិធី ផ្សព្វផ្សាយ​សៀវភៅ «ឱសថការីបារាំងម្នាក់ នៅស្រុកខ្មែរ» នៅព្រឹកថ្ងៃទី១៤ ខែធ្នូ ឆ្នាំ២០២៣​នេះ។

ពិធីនេះប្រព្រឹត្តទៅក្រោមអធិបតីភាព ឯកឧត្តមសាស្ត្រាចារ្យ យឺត ស៊ុនណារ៉ា រដ្ឋលេខាធិការ​ក្រសួង​សុខាភិបាល តំណាងដ៏ខ្ពង់ខ្ពស់ឯកឧត្តមសាស្ត្រាចារ្យ ឈាង រ៉ា រដ្ឋមន្ត្រីក្រសួង​សុខាភិបាល ​និ​ងមានការចូលរួមពីសំណាក់លោក Pierre Vincent (ព្យែរ វ៉ាង់សង់)ទីប្រឹក្សា​កិច្ច​សហ​ប្រតិបត្តិការ និងសកម្មភាពវប្បធម៌ នៃស្ថានទូតបារាំង ប្រចាំនៅព្រះរាជាណាចក្រកម្ពុជា លោក​ជំទាវសាស្ត្រាចារ្យ ទេព រង្ស៊ី អតីតព្រឹទ្ធបុរសមហាវិទ្យាល័យឱសថសាស្ត្រ នៃ​សាកល​វិទ្យាល័យ​វិទ្យាសាស្រ្តសុខាភិបាល ឯកឧត្តម លោកជំទាវ ថ្នាក់ដឹកនាំក្រសួង​សុខាភិបាល ឯកឧត្តមសាស្ត្រា​ចារ្យសាកលវិទ្យាធិការ នៃសាកលវិទ្យាល័យវិទ្យាសាស្ត្រសុខាភិបាល សាស្ត្រាចារ្យ មន្ត្រីបុគ្គលិក និស្សិត សរុប ប្រមាណ ៣៥០នាក់។

ឯកឧត្តម​សាស្រ្តាចារ្យ សាផុន វឌ្ឍនៈ សាកលវិទ្យាធិការ នៃសាកលវិទ្យាល័យ​វិទ្យាសាស្រ្ត​សុខាភិបាល បានលើកឡើងថា សៀវភៅ «ឱសថការីបារាំងម្នាក់ នៅស្រុកខ្មែរ» នេះ ត្រូវបាន និពន្ធជាភាសាបារាំង ដោយលោក សាស្ត្រាចារ្យ Jean Cros (ហ្សង់ ក្រូស) សាស្ត្រាចារ្យ នៃ​សាកល​វិទ្យាល័យ Toulouse (ទូលូ)ប្រទេសបារាំង និងត្រូវបានបកប្រែ ជាភាសាខ្មែរ និង​ផ្សព្វ​ផ្សាយ​នៅ​ប្រទេសកម្ពុជា ដោយលោកជំទាវសាស្ត្រាចារ្យ ទេព រង្ស៊ី អតីតព្រឹទ្ធ​បុរស​មហា​វិទ្យាល័យ​ឱសថ​សាស្ត្រ នៃសាកលវិទ្យាល័យវិទ្យាសាស្ត្រសុខាភិបាល តាមរយៈការផ្ដល់សិទ្ធបកប្រែ និង​ផ្សព្វ​ផ្សាយ ដោយរោងពុម្ព Privat (ព្រីវ៉េត)និងលោកសាស្ត្រាចារ្យ Jean Cros ផ្ទាល់។ សៀវភៅនេះ ជាសៀវភៅមួយ ឧទ្ទិសដល់វិស័យឱសថសាស្ត្រ ដែលបានរៀបរាប់អំពីប្រវត្តិ និងការ​វិវឌ្ឍ​នៃ​ការបណ្តុះបណ្តាលឱសថការី នៅប្រទេសកម្ពុជា និងការជួយគាំទ្រពីកិច្ចសហប្រតិបត្តិការ បារាំង លើការបណ្តុះបណ្តាលវិស័យសុខាភិបាល ព្រមទាំងបានឆ្លុះបញ្ចាំងពីកិច្ចខិតខំប្រឹងប្រែង របស់ប្រទេសកម្ពុជា ក្នុងការស្ដារឡើងវិញវិស័យសុខាភិបាល ចេញពីបាតដៃទទេ ក្រោយ​ការ​ដួល​រលំ នៃរបបប្រល័យពូជសាសន៍ ប៉ុល ពត។

នាឱកាសនោះឯកឧត្តមសាស្ត្រាចារ្យ យឺត ស៊ុនណារ៉ា បានកោតសរសើរជូនចំពោះលោកជំទាវ ទេព រង្ស៊ី ដែលបានខិតខំប្រឹងប្រែងចំណាយពេលវេលា កម្លាំងកាយចិត្តស្មារតី ប្រាជ្ញា និង​ធន​ធាន​ផ្ទាល់​ខ្លួន ក្នុងការបកប្រែជាភាសាខ្មែរនេះ និងបោះពុម្ពសៀវភៅដ៏មានអត្ថប្រយោជន៍នេះ។ កាយ​វិការ​ដ៏ឧត្តុង្គឧត្តមនេះ គឺជាគំរូដ៏ល្អបំផុតសម្រាប់សាស្រ្តាចារ្យ អ្នកប្រកបវិជ្ជាជីវៈសុខាភិបាល និង​និសិ្សត ក្នុងវិស័យសុខាភិបាលទាំងអស់ ក្នុងការបង្កើតជាស្នាដៃឯកសារជាភាសាខ្មែរ សម្រាប់​ជា​ប្រយោជន៍ដល់សាធារណជនក្នុងវិស័យសុខាភិបាលទាំងមូល។ ថ្វីត្បិត​យើង​មាន​ការ​រីក​ចម្រើន​ក្នុង​ការ​បណ្តុះបណ្តាលលើវិស័យសុខាភិបាលកី្ត ប៉ុន្តែឯកសារយោងផ្សេងៗភាគច្រើន គឺជា​ភាសា​បារាំង អង់គ្លេស និងមានតិចណាស់ជាភាសាខ្មែរ។

ឯកឧត្តម រដ្ឋលេខាធិការ សូមយកឱកាសនេះ អំពាវនាវ និងលើ​ក​ទឹក​ចិត្ត​ដល់​សាស្រ្តា​ចារ្យ​សាកលវិទ្យាល័យ​វិទ្យាសាស្រ្តសុខាភិបាល សូមជួយខិតខំចង​ក្រង​សៀវភៅ​ក្នុង​វិស័យ​សុខាភិបាល​ឲ្យ​បាន​ច្រើនបន្តទៀត ដើម្បីជាឯកសារសម្រាប់ការសិក្សាស្រាវជ្រាវរបស់និសិ្សតយើង៕ អត្ថបទ រដ្ឋា