ក្នុងរយៈពេល១២ខែ គិតចាប់ពីដើមខែមករា ដល់ថ្ងៃទី១៥ ខែធ្នូ ឆ្នាំ២០២៣នេះ គ្រោះអគ្គិភ័យនៅក្នុងភូមិសាស្ត្ររាជធានីភ្នំពេញ បានកើតឡើងចំនួន ១២៨ករណី ដែលបានឆក់យកអាយុជីវិតមនុស្ស ១៥នាក់ មានមនុស្សរងរបួស ១៤នាក់ និងបានបំផ្លិចបំផ្លាញលំនៅឋានពលរដ្ឋមួយចំនួនធំផងដែរ ។
លោកវរសេនីយ៍ឯក ព្រហ្ម យ៉ន នាយការិយាល័យនគរបាលបង្ការពន្លត់អគ្គិភ័យ និងសង្គ្រោះ នៃស្នងការដ្ឋាននគរបាលរាជធានីភ្នំពេញបានប្រាប់ BTV ឱ្យដឹងថា កត្តាចម្បងដែលតែងបង្កជាគ្រោះអគ្គិភ័យកើតមានឡើង គឺបណ្តាលមកពីឆ្លងចរន្តអគ្គិសនី ហើយក្នុងនោះ កត្តាមនុស្សក៏ជាផ្នែកមួយ នៃការបង្កឱ្យកើតមានគ្រោះអគ្គីភ័យដែរ ព្រោះតែការធ្វេសប្រហែស ឬខ្វះការប្រុងប្រយ័ត្ន លើការផ្សារដែក អុចទៀនធូបទុកចោល ឬចោលកន្ទុយបារីជាដើម ។
គួរបញ្ជាក់ថា ដើម្បីជាការឆ្លើយតបនឹងគ្រោះអគ្គិភ័យដែលឧស្សាហ៍កើតមានឡើងនោះ កម្លាំងនគរបាល នៃការិយាល័យនគរបាលបង្ការពន្លត់អគ្គីភ័យ និងសង្គ្រោះ នៃស្នងការដ្ឋាននគរបាលរាជធានីភ្នំពេញ ក៏បានត្រៀមលក្ខណះសម្បត្តិរបស់ខ្លួនជានិច្ច និងជាប្រចាំមិនថាយប់ ឬថ្ងៃនោះឡើយ ក្នុងការចេញអន្តរាគមន៍ជួយសង្គ្រោះដល់បងប្អូនប្រជាពលរដ្ឋទាំងអស់ដែលជួបនឹងគ្រោះអគ្គិភ័យឆាបឆេះលំនៅឋាន ឬឆាបឆេះអ្វីផ្សេង ដែលត្រូវការការជួយអន្តរាគមន៍ពីសំណាក់សមត្ថកិច្ចអគ្គិភ័យជាចាំបាច់បំផុតនោះ ។
ក្នុងនោះដែរ កម្លាំងជំនាញការិយាល័យ បានពង្រាយកម្លាំង និងរថយន្តពន្លត់អគ្គិភ័យរបស់ខ្លួនជាច្រើនគោលដៅ តាមគោលដៅនីមួយៗដែលបានកំណត់ ដើម្បីជាការងាយស្រួលក្នុងការចុះអន្តរាគមន៍ទាន់ពេលវេលា ចំពោះទីតាំងដែលមានហេតុការណ៍អគ្គីភ័យកើតឡើង៕ អត្ថបទ៖ លីហេង
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
