ក្រសួងការបរទេសទួរគី បាននិយាយថា ប្រទេសទួរគីថ្កោលទោសយ៉ាងដាច់អហង្ការ ចំពោះ «ការបង្កហេតុ» ដោយកងកម្លាំងអ៊ីស្រាអែល អំឡុងពេលវាយឆ្មក់លើជំរុំជនភៀសខ្លួន នៅទីក្រុង Jenin ភាគខាងលិចតំបន់កាន់កាប់វ៉េសប៊ែង ហើយថា នេះជាការប្រមាថមើលងាយវិហារអ៊ីស្លាម នៅទីនោះ ដោយអំពាវនាវឲ្យមានការផ្ដន្ទាទោសអ្នកទទួលខុសត្រូវទាំងនោះ។

ទាហានអ៊ីស្រាអែលបានសម្លាប់យុវជនម្នាក់ នៅមន្ទីរពេទ្យ និងអានការអធិស្ឋានរបស់ជនជាតិជ្វីហ្វ នៅវិហារអ៊ីស្លាមមួយ ក្នុងទីក្រុង Jenin អំឡុងពេលការវាយឆ្មក់ ដែលអាជ្ញាធរប៉ាឡេស្ទីន បាននិយាយថា បានសម្លាប់មនុស្ស ១២នាក់ និងដែលអ៊ីស្រាអែល បាននិយាយថា បានជួយចាប់ខ្លួនពួកសកម្មប្រយុទ្ធរាប់សិបនាក់។

អ្នកនាំពាក្យ លោក Oncu Keceli បានឲ្យដឹងតាមរយៈសារ នៅលើបណ្ដាញសង្គម X កាលពីយប់ថ្ងៃព្រហស្បតិ៍ (ទី១៤ ខែធ្នូ) ថា៖ «យើងថ្កោលទោសយ៉ាងខ្លាំង ចំពោះការបង្កហេតុរបស់ទាហានអ៊ីស្រាអែល ដែលបានសម្រុកចូលជំរុំជនភៀសខ្លួន នៅទីក្រុង Jenin និងការមិនគោរពទីកន្លែងសក្ការៈដ៏ពិសិទ្ធ ដោយការចូលទៅក្នុងវិហារអ៊ីស្លាមនោះ»។

ទួរគីដែលគាំទ្រដំណោះស្រាយរដ្ឋពីរ ចំពោះជម្លោះអ៊ីស្រាអែល និងប៉ាឡេស្ទីន ដែលមានអាយុកាលរាប់ទសវត្សរ៍ហើយនោះ បានរិះគន់យ៉ាងចាស់ដៃលើអ៊ីស្រាអែល ចំពោះការវាយប្រហារលើតំបន់ហ្គាហ្សា និងនៅតំបន់វ៉េសប៊ែង ដោយនិយាយថា អ្នកតាំងទីលំនៅរបស់អ៊ីស្រាអែល នៅក្នុងតំបន់នេះ គឺជា «ភេរវករ»។ ហើយខ្លួនបានអំពាវនាវឲ្យមានបទឈប់បាញ់ជាបន្ទាន់ និងបានថ្កោលទោសការគាំទ្ររបស់លោកខាងលិចសម្រាប់អ៊ីស្រាអែល៕