អ្នកនាំពាក្យរបស់ប្រព័ន្ធផ្សព្វផ្សាយអារ៉ាប់ បានឲ្យដឹងថា អ្នកថតរូបរបស់សារព័ត៌មាន Al Jazeera ត្រូវបានសម្លាប់ កាលពីថ្ងៃសុក្រ (ទី១៥ ខែធ្នូ) នៅភាគខាងត្បូងតំបន់ហ្កាហ្សាស្ទ្រីប។

ប្រព័ន្ធផ្សព្វផ្សាយ Al Jazeera បានឲ្យដឹងនៅក្នុងសេចក្តីថ្លែងការណ៍មុននេះថា អ្នកថតរូបឈ្មោះ Samer Abu Daqqa បានរងរបួស រួមជាមួយនឹងសហការីម្នាក់ ខណៈពេលដែលកំពុងធ្វើការផ្សាយពីការទម្លាក់គ្រាប់បែក នៅក្នុងសាលារៀនមួយ។ ក្រុមអ្នកជួយសង្គ្រោះមិនអាចចូលទៅជួយ Abu Daqqa ដើម្បីយកលោកទៅព្យាបាលបានឡើយ។

ហើយអ្នកនាំពាក្យរបស់ប្រព័ន្ធផ្សព្វផ្សាយនេះ បានប្រាប់ថា៖ «ក្រុមអ្នកជួយសង្គ្រោះទើបតែអាចចូលទៅយកសពអ្នកថតរូប Samer Abu Daqqa មកវិញ»។

យោងតាមក្រុមអ្នកសារព័ត៌មានប៉ាឡេស្ទីន អ្នកសារព័តមានចំនួន ៩០នាក់ហើយ ត្រូវបានសម្លាប់ដោយការវាយប្រហារតាមអាកាសរបស់អ៊ីស្រាអែល នៅហ្កាហ្សានេះ គិតចាប់តាំងពីថ្ងៃទី៧ ខែតុលាមក។

ប្រព័ន្ធផ្សព្វផ្សាយ Al Jazeera បាននិយាយថា អ្នកសារព័ត៌មាន ត្រូវបានវាយប្រហារដោយគ្រាប់មីស៊ីល ដែលបាញ់ចេញពីយានដ្រូន នៅក្នុងទីក្រុង Khan Younis ភាគខាងត្បូងតំបន់ហ្កាហ្សា៕