ក្រុមហ៊ុនដឹកជញ្ជូនដាណឺម៉ាក A.P. Moller-Maersk នឹងផ្អាករាល់ការដឹកជញ្ជូនកុងតឺន័រទាំងអស់ ដែលឆ្លងកាត់សមុទ្រក្រហម រហូតដល់មានការជូនដំណឹងបន្ថែម។ នេះបើតាមអ្នកនាំពាក្យរបស់ក្រុមហ៊ុននេះ ដែលបានប្រាប់សារព័ត៌មានរ៉យទ័រ កាលពីថ្ងៃសុក្រ (ទី១៥ ខែធ្នូ)។

ក្រុមហ៊ុនបានឲ្យដឹងនៅក្នុងសេចក្តីថ្លែងការណ៍ថា៖ «បន្ទាប់ពីមានឧប្បត្តិហេតុ ដែលស្ទើរតែបង្កឲ្យមានការខូចខាតដល់នាវា Maersk Gibraltar កាលពីម្សិលមិញ និងការវាយប្រហារមួយផ្សេងទៀត លើនាវាកុងតឺន័រ នៅថ្ងៃនេះ យើងបានណែនាំនាវារបស់ក្រុមហ៊ុន Maersk ទាំងអស់ នៅក្នុងតំបន់ ដែលត្រូវឆ្លងកាត់ច្រកសមុទ្រ Bab al-Mandab ផ្អាកការធ្វើដំណើរសិន រហូតដល់មានការជូនដំណឹងបន្ថែម»។

ក្រុមហ៊ុន Maersk កាលពីថ្ងៃព្រហស្បតិ៍ (ទី១៤ ខែធ្នូ) បាននិយាយថា នាវា Maersk Gibraltar របស់ខ្លួន ត្រូវបានកំណត់គោលដៅវាយប្រហារដោយមីស៊ីល ខណៈកំពុងធ្វើដំណើរពីទីក្រុង Salalah ប្រទេសអូម៉ង់ ទៅកាន់ទីក្រុង Jeddah ប្រទេសអារ៉ាប៊ីសាអ៊ូឌីត ហើយថា នាវិក និងនាវា ត្រូវបានរាយការណ៍ថា មិនមានគ្រោះថ្នាក់អ្វីឡើយ។

កាលពីព្រឹកថ្ងៃសុក្រ (ទី១៥ ខែធ្នូ) ក្រុមហ៊ុន Maersk បានបដិសេធការអះអាងរបស់ក្រុមឧទ្ទាម Houthi ដែលមានសម្ព័ន្ធមិត្តជាមួយប្រទេសយេម៉ែន ដែលថា កងជីវពលបានវាយប្រហារនាវា Maersk ដែលកំពុងធ្វើដំណើរឆ្ពោះទៅកាន់ប្រទេសអ៊ីស្រាអែល។ ហើយបន្ទាប់ពីមានការអះអាងពីក្រុមឧទ្ទាម Houthi នេះ អ្នកនាំពាក្យក្រុមហ៊ុន Maersk បានប្រាប់ទីភ្នាក់ងារសារព័ត៌មាន Reuters នៅក្នុងសេចក្តីថ្លែងការណ៍តាមរយៈសារអេឡិចត្រូនិកថា «នាវាមិនត្រូវបានវាយប្រហារនោះទេ»។

ក្រុម Houthis បានអះអាងថា ពួកគេបានធ្វើប្រតិបត្តិការយោធាប្រឆាំងនឹងនាវាកុងតឺន័ររបស់ក្រុមហ៊ុន Maersk ដោយបានវាយប្រហារដោយផ្ទាល់ជាមួយយានដ្រូន។ តែយ៉ាងណាក្ដី ក្រុម Houthis ដែលធ្វើការអះអាងក្នុងសេចក្តីថ្លែងការណ៍នោះ មិនបានបញ្ចេញភ័ស្តុតាងណាមួយឡើយ ដើម្បីបញ្ជាក់ពីការប្រហារនេះ៕