ពោធិ៍សាត់៖ នេះជាលើកទីមួយហើយដែល ក្រុមការងារចុះជួយមូលដ្ឋានស្រុកបាកាន បាន​រៀបចំ​អោយ​មាន​ការប្រកួតកីឡា ដណ្ដើមពានរង្វាន់ប្រាក់លាន ឯកឧត្តម កែវ រតនៈ និង​ឯកឧត្តម​បណ្ឌិត ទី នរិន្ទ ក្នុងស្រុកបាកាន ដើម្បីអបអរសាទរ ទិវាបុណ្យជាតិ ៧ មករា ១៩៧៩-២០២៤ ។ ព្រឹត្តិការណ៍​កីឡានេះដឹកនាំរៀបចំដោយ ឯកឧត្តមបណ្ឌិត ទី ថានី អនុប្រធាន​ក្រុម​ការងារ​ចុះជួ​យ​ស្រុក​បាកាន និងឯកឧត្តម ជៀប សួរ រួមនិងក្រុមការងារ ក្រោមការឧបត្ថម្ភ ដោយឯកឧត្តម កែវ រតនៈ ប្រធានក្រុមការងារចុះជួយមូលដ្ឋានខេត្តពោធិ៍សាត់ និងឯកឧត្តមបណ្ឌិត ទី នរិន្ទ ប្រធាន​ក្រុម​ការងារ​ចុះជួយស្រុកបាកាន រួមនិងសសប្បុរសជននានា ។ ដោយមានកីឡាករបាល់ទាត់ បាល់ទះ ស្ម័គ្រចិត្តចូលរួមសរុបជិត១០០០នាក់ ដោយបែកចែកជា៣៩ក្រុម ក្នុងនោះ ៣៤​ក្រុម​ជា​ក្រុម​យុវជន និង​មហាជន ចំណែក៥ក្រុមទៀតជាក្រុមកិត្តិយស ។

ក្នុងឱកាសអញ្ជើញជា អធិបតីភាពក្នុងពិធីបើកព្រឹត្តិការណ៍កីឡានេះ ឯកឧត្តមបណ្ឌិត ទី នរិន្ទ បាន​លើក​ឡើងថា យើងជួបជុំគ្នារៀបចំកម្មវិធីនេះឡើងគឺក្នុងគោលបំណង សម្តែងការដឹងគុណ និង​អបអរសាទរដល់ថ្ងៃជ័យជម្នះ៧មករា ដែលជាថ្ងៃកំណើតទី២របស់យើង បើគ្មានថ្ងៃ៧មករា ១៩៧៩ យើងក៏គ្មានថ្ងៃនេះដែរ ។ ហើយក្រៅពីផ្តល់ប្រយោជន៍ដល់សុខភាព កីឡាបាននាំ​មក​នូវ​សាមគ្គី​ភាព និងមិត្តភាព ជាពិសេសធ្វើ​អោយ​យើង​ជៀស​ផុត​ពី​អំពើរ​អបាយ​មុខ​ផ្សេង​ៗដូ​ច​ជា​គ្រឿង​ញៀន និងល្បែងស៊ីសងជាដើម ។

សូមបញ្ជាក់ដែរថា ព្រឹត្តិការណ៍កីឡានេះ រួមមានវិញ្ញាសារបាល់ទាត់មានផ្នែកបុរស- ផ្នែកនារី និង​ផ្នែក​គូរ​កិត្តិយស ដែលត្រូវប្រកួតតាមទីលានចំនួន៥ទីតាំង ចំណែក​វិញ្ញាសា​បាល់ទះ​មាន​ផ្នែក​បុរស និងផ្នែកនារី ដោយធ្វើការប្រកួតចំនួន៣ទីតាំងផ្សេងគ្នា ចំពោះការប្រកួត គឺជារៀង​រាល់​ចុង​សប្តាហ៍ ចាប់ពីថ្ងៃទី១៦ ខែធ្នូ ឆ្នាំ២០២៣ រហូតដល់ថ្ងៃទី៧ ខែមករា ឆ្នាំ២០២៤៕ អត្ថបទ ៖ ភិរុណ