បាល់ទាត់៖ ​កីឡាករ និង​អ្នកគាំទ្រ​មិន​ថា ​ដា​ណឺ​ម៉ាក រឺ​ប៊ែ​ល​ហ្ស៊ិ​ក​រួម​ជាមួយ​អាជ្ញា​កណ្ដាល​សុទ្ធតែ​បង្ហាញ​សេចក្តី​ស្រលាញ់ និង​ទះដៃ​លើកទឹកចិត្ត​ដល់​ខ្សែបម្រើ​ដា​ណឺ​ម៉ាក Christian Eriksen ដែល​បាន​ដួល​សន្លប់​កាលពី​សប្ដាហ៍​មុន​។

​​ការប្រកួត​រវាង​ដា​ណឺ​ម៉ាក និង​ប៊ែ​ល​ហ្ស៊ិ​ក​បាន​ឈប់​នៅ​នាទី​ទី​១០ ដើម្បី​ទះដៃ​លើកទឹកចិត្ត​ដល់ Eriksen ដែល​កំពុង​សម្រាក​ព្យាបាល​នៅ​មន្ទីរពេទ្យ​។ ​Eriksen បាន​ធូរស្បើយ​ច្រើន​ហើយ និង​បាន​សរសេរ​សារ​ជា​សាធារណៈ​អរគុណ​អ្នកគាំទ្រ​របស់​ខ្លួន ក៏ដូចជា​មិត្ត​រួម​ក្រុម គ្រូ​បង្វឹក អ្នក​រាល់គ្នា​ដែល​បាន​បង្ហាញ​ក្តី​បារម្ភ និង​ជូនពរ​។ ​ការប្រកួត​នៅ​កីឡដ្ឋាន Parken ក្នុង​ទីក្រុង Copenhagen ប្រទេស​ដា​ណឺ​ម៉ាក​កាលពី​យប់មិញ​គឺជា​កីឡដ្ឋាន​ដដែល​ដែល Christian Eriksen បាន​ដួល​សន្លប់​មុន​ចប់​វគ្គ​ទី​១ ក្នុង​ការប្រកួត​ដែល​ដា​ណឺ​ម៉ាក​ចាញ់​ហ្វាំ​ង​ឡង់ ១-០​។​

​​ចំណែក​ការប្រកួត​យប់មិញ​ដែល​ដា​ណឺ​ម៉ាក​នាំមុខ​មុន​នៅ​នាទី​ទី២ ដោយ Yussuf Poulsen នោះ ខ្សែបំរើ Manchester City, Kevin de Bruyne ដែល​ផ្លាស់​ចូល​នៅ​វគ្គ​ទី២ គឺជា​តួអង្គ​សំខាន់​ដែល​ជួយ​អោយ​ប៊ែ​ល​ហ្ស៊ិ​ក​វាយបក​ ២​គ្រាប់​វិញ​យកឈ្នះ​ការប្រកួត​នេះ​ បន្ទាប់ពី​គ្រាប់​តាម​ស្មើ​បញ្ជូន​អោយ Thorgan Hazard សំរេច​ទី និង​គ្រាប់​ទី​ពីរ​សំរេច​ទី​ដោយ​ខ្លួនឯង​។ ​ចប់​ការប្រកួត​ប៊ែ​ល​ហ្ស៊ិ​ក​យកឈ្នះ​ដា​ណឺ​ម៉ាក ២-១ កក់​កៅអី​នៅ​វគ្គ ១៦​ក្រុម​ចុងក្រោយ​។ ​លទ្ធ​ផល​ផ្សេងទៀត​នៅ​ក្នុង​ពូ​ល C ហូ​ឡង់​ក៏បាន​កក់​កៅអី​នៅ​ជុំ​បន្ត​ដែរ​ក្រោយ​ឈ្នះ​អូទ្រីស ២-០ ខណៈអ៊ុយ​ក្រែ​ន​យកឈ្នះ​ម៉ា​សេ​ដ្វា​ន់​ខាងជើង ២-១៕

​អត្ថបទ​៖​នាង សុភា​វុ​ធ