ក្រុមមន្ត្រីបាននិយាយថា បណ្តាប្រទេសសមាជិក និងសមាជិកសភារបស់សហភាពអឺរ៉ុប ឬ EU នៅថ្ងៃពុធ (ទី២០ ខែធ្នូ) នេះ បានឈានដល់កិច្ចព្រមព្រៀងមួយ ជុំវិញការកែប្រែច្បាប់របស់ប្លុកស្តីពីការដោះស្រាយ ចំពោះអ្នកស្វែងរកសិទ្ធិជ្រកកោន និងជនអន្តោប្រវេសន៍។

កំណែទម្រង់នេះ រួមមានការពិនិត្យវាយតម្លៃឲ្យបានលឿនជាងមុននៃការមកដល់ខុសពីធម្មតា ការបង្កើតមជ្ឈមណ្ឌលឃុំខ្លួនតាមព្រំដែន ការពន្លឿនការនិរទេស សម្រាប់អ្នកស្នើសុំសិទ្ធិជ្រកកោន ដែលត្រូវបានបដិសេធ ហើយនិងយន្តការសាមគ្គីភាព ដើម្បីជួយសម្រាលសម្ពាធពីបណ្តាប្រទេសភាគខាងត្បូង ដែលជួបប្រទះនឹងលំហូរជនអន្តោប្រវេសន៍ដ៏ច្រើន។

ប្រទេសអេស្ប៉ាញ ដែលធ្វើជាប្រធាននៃកិច្ចពិភាក្សាដ៏យូរនេះ ក្នុងតួនាទីប្រធានសហភាពអឺរ៉ុបរបស់ខ្លួន បានឲ្យដឹងនៅលើបណ្ដាញសង្គម X (ពីមុនជា Twitter) ថា៖ «កិច្ចព្រមព្រៀងនយោបាយ ត្រូវបានឈានដល់លើឯកសារចំនួនប្រាំនៃកិច្ចព្រមព្រៀងថ្មីរបស់សហភាពអឺរ៉ុបស្តីពីទេសន្តរប្រវេសន៍ និងការសុំសិទ្ធិជ្រកកោន»។

អនុប្រធានគណៈកម្មការអឺរ៉ុប លោក Margaritis Schinas បានលើកឡើងថា៖ «វាជាដំណើរផ្លូវដ៏វែងឆ្ងាយ ដើម្បីបានមកដល់ទីនេះ។ ប៉ុន្តែយើងសម្រេចបានហើយ។ នៅទីបំផុត អឺរ៉ុបកំពុងធ្វើអ្វី ដែលចាំបាច់ ពាក់ព័ន្ធនឹងជនអន្តោប្រវេសន៍»។ ហើយប្រធានគណៈកម្មាការអឺរ៉ុប លោកស្រី Ursula von der Leyen បានបន្ថែមថា៖ «ទេសន្តរប្រវេសន៍ គឺជាបញ្ហាប្រឈមរួមរបស់អឺរ៉ុប។ ការសម្រេចថ្ងៃនេះ នឹងអាចឲ្យយើងគ្រប់គ្រងបញ្ហានេះជាមួយគ្នា»។

យ៉ាងណាក្ដី កិច្ចព្រមព្រៀងនេះនៅតែត្រូវការអនុម័តជាផ្លូវការ ដោយក្រុមប្រឹក្សាអឺរ៉ុប ដែលតំណាងឲ្យប្រទេសសមាជិកសហភាពអឺរ៉ុបទាំង២៧ និងសភាអឺរ៉ុប មុនពេលដែលច្បាប់នេះចូលជាធរមាននៃច្បាប់របស់ប្លុក៕