ចំនួនអ្នកស្លាប់ដោយសារគ្រោះរញ្ជួយដីនៅប្រទេសចិន បានកើនឡើងដល់ ១៣៤នាក់ ហើយមនុស្សជិត ១.០០០នាក់បានរងរបួស ខណៈ​ក្រុម​អ្នក​ជួយ​សង្គ្រោះ​ស្វះស្វែង​ជីក​កកាយ​តាម​គំនរ​បាក់​បែកដើម្បីស្វែងរកអ្នកនៅរស់ក្រោមលក្ខខណ្ឌអាកាសធាតុដ៏ត្រជាក់។

យោងតាមប្រព័ន្ធផ្សព្វផ្សាយរដ្ឋបានឱ្យដឹងថា ការរញ្ជួយដីកម្រិត ៦,២រ៉ិចទ័រ បាន​វាយ​ប្រហារ​ភ្លាមៗ​មុនពាក់កណ្តាលអធ្រាត្រកាលពីថ្ងៃច័ន្ទ នៅក្នុងស្រុក ជីសាន (Jiishan) ក្បែរ​ព្រំដែន​ នៃខេត្តកាន់ស៊ូ (Gansu) និងខេត្តឈីងហៃ (Qinghai) ដោយបានបំផ្លិចបំផ្លាញ ឬធ្វើឲ្យ​ខូច​ខាត​ផ្ទះ​សម្បែងជាង ១៥០.០០០ខ្នង នេះបើយោងតាមប្រព័ន្ធផ្សព្វផ្សាយរដ្ឋ។

គ្រោះរញ្ជួយដីដែលបន្តដោយការរញ្ជួយដ៏ខ្លាំងក្លាជាច្រើនដងបានបណ្តាលឱ្យមានលំហូរល្បប់ និង​បំណាក់ដី ព្រមទាំងការបំផ្លាញខ្សែថាមពល និងហេដ្ឋារចនាសម្ព័ន្ធក្នុងស្រុកផ្សេងទៀត «ក្នុង​កម្រិត​ខ្ពស់​ខ្លាំង»។ ទូរទស្សន៍រដ្ឋ CCTV បាននិយាយថា យ៉ាងហោចណាស់មនុស្ស ១៣៤នាក់ ត្រូវ​បានសម្លាប់នៅក្នុងខេត្តកាន់ស៊ូ ភាគពាយ័ព្យ និងខេត្តឈីងហៃ ដែលនៅជិតខាង។

ស្រប​ពេលរលកត្រជាក់ដ៏អូសបន្លាយរយៈពេលជាច្រើនថ្ងៃបានបោកបក់ពាសពេញប្រទេសចិន តំបន់​រយៈកម្ពស់ខ្ពស់នៅភាគពាយ័ព្យនៃប្រទេសចិន បាន​រាយការណ៍​អំពី​សីតុណ្ហភាព​ចុះ​ទាប​​រហូត​ដល់​ដក ១៦អង្សារសេ ដែលរារាំងដល់កិច្ចប្រឹងប្រែងជួយសង្គ្រោះ។ ក្រុមអ្នកឆ្លើយតប រួមទាំង​អ្នកពន្លត់អគ្គិភ័យ ១.៥០០នាក់ មន្ត្រីនគរបាល ១.៥០០នាក់ ទាហានសង្រ្គោះ ១.០០០​នាក់ និងគ្រូពេទ្យប្រហែល ៤០០នាក់ បានបន្តទាញមនុស្សចេញពីគំនរបាក់បែក និង​ព្យាបាល​អ្នក​របួស​៕