ភ្នំពេញ៖ សម្រាប់ឆ្នាំ ២០២១នេះ ស្ថានទូតឥណ្ឌាប្រចាំកម្ពុជា នឹងរៀបចំទិវាយោគៈអន្តរជាតិលើកទី៧ នៅថ្ងៃទី២១ ខែមិថុនាខាងមុខ។ ការរៀបចំសម្រាប់ឆ្នាំនេះ គឺនឹងមានការកំណត់ចំនួនមនុស្សចូលរួមត្រឹម ១៥នាក់ ដើម្បីចូលរួមទប់ស្កាត់ការចម្លងរីករាលដាលកូវីដ-១៩។ នេះជាការលើកឡើងរបស់លោកជំទាវ ឯកអគ្គរដ្ឋទូតឥណ្ឌាប្រចាំកម្ពុជា។
ជាការត្រៀមសម្រាប់ ទិវាយោគៈអន្តរជាតិថ្ងៃទី២១ មិថុនាឆ្នាំ ២០២១ខាងមុខនេះ ស្ថានទូតឥណ្ឌា បានរៀបចំកម្មវិធីបើកឆាកហាត់យោគ្គៈ នៅព្រឹកនេះ ដោយចំនួនអ្នកចូលរួមមានត្រឹមប្រមាណ ១០នាក់ប៉ុណ្ណោះ។ សម្រាប់ការហាត់យោគ្គៈនាព្រឹកនេះផ្ទាល់ លោកជំទាវ ដេវយ៉ានី ឃុប្រាហ្កាដេ ឯកអគ្គរដ្ឋទូតឥណ្ឌាប្រចាំកម្ពុជា បានលើកឡើងថា ទិវាយោគៈអន្តរជាតិលើកទី៧ គឺនឹងកំណត់អ្នកចូលរួមមកត្រឹម ១៥នាក់ប៉ុណ្ណោះ ដើម្បីគោរពតាមបទដ្ឋាននៃការណែនាំរបស់ក្រសួងសុខាភិបាល ដោយរាប់បញ្ចូលទាំងការរក្សាគម្លាត ដើម្បីចូលរួមទប់ស្កាត់ការរីករាលដាល កូវីដ-១៩។
លោកជំទាវឯកអគ្គរដ្ឋទូត បានលើកឡើងបន្ថែមថា យោគៈគឺជាសិល្បៈនិងវិទ្យាសាស្ត្រនៃការរស់នៅប្រកបដោយសុខភាពល្អ ដែលនាំឱ្យមានភាពសុខដុមរវាងចិត្ត និងកាយ មនុស្សនិងធម្មជាតិ។ លោកជំទាវបញ្ជាក់ថែមថា ការហាត់យោគៈ កាន់តែមានសារៈសំខាន់ ក្នុងពេលបច្ចុប្បន្នស្របពេលដែលពិភពលោកកំពុងប្រឈមនិងការរាតត្បាតនៃ កូវីដ-១៩ ព្រោះការហាត់នេះ នឹងធ្វើឱ្យសុខភាពផ្លូវចិត្តបានស្ងប់និងសុខភាពផ្លូវកាយមាំទាំផងដែរ។
ក្នុងឱកាសដដែលនេះ លោកជំទាវឯកអគ្គរដ្ឋទូត ក៏បានថ្លែងអំណរគុណ ចំពោះក្រសួងទេសចរណ៍ និងក្រសួងអប់រំយុវជន និងកីឡា ដែលសម្រាប់កិច្ចសហប្រតិបត្តិការ ក្នុងការរៀបចំព្រឹត្តិការណ៍យោគៈអន្តរជាតិ នាពេលកន្លងដោយជោគជ័យជាខ្លាំង។
គួរបញ្ជាក់ថា ថ្ងៃទី ២១ ខែមិថុនា ត្រូវបានទទួលស្គាល់ជា ទិវាយោគៈអន្តរជាតិ ដោយមហាសន្និបាតអង្គការសហប្រជាជាតិនៅខែធ្នូ ឆ្នាំ ២០១៤ តាមគំនិតផ្ដួចផ្ដើមរបស់នាយករដ្ឋមន្ត្រី ណារិនត្រា ម៉ូឌី។ ចាប់តាំងពីឆ្នាំ២០១៥មក ព្រឹត្តិការណ៍យោគៈអន្តរជាតិ ត្រូវបានគេសង្កេតឃើញថាមានការប្រារព្ធធ្វើឡើងនៅទូទាំងពិភពលោក៕ អត្ថបទ៖ គឹមហុក