រដ្ឋមន្ត្រីការបរទេសចិនលោក Wang Yi បានព្រមានហ្វីលីពីនឲ្យធ្វើការដោះស្រាយ តាមរយៈការសន្ទនា ជាអ្វីដែលចិនមើលឃើញថា ជា «ការលំបាកដ៏ធ្ងន់ធ្ងរ» នៅក្នុងទំនាក់ទំនងរបស់ប្រទេសទាំង២ ជុំវិញបញ្ហាសមុទ្រចិនខាងត្បូង ដែលការប៉ះទង្គិចគ្នា រវាងនាវាពីភាគីទាំង២ បានកើនឡើង។

ទីក្រុងប៉េកាំង និងទីក្រុងម៉ានីល បានធ្វើការចោទប្រកាន់គ្នាទៅវិញទៅមកយ៉ាងខ្លាំងក្លា ក្នុងរយៈពេលប៉ុន្មានខែថ្មីៗនេះ ជុំវិញជម្លោះ ពាក់ព័ន្ធនឹងទូកនេសាទ នាវាឆ្មាំល្បាតឆ្នេរសមុទ្រ និងនាវាផ្សេងទៀត នៅក្នុងសមុទ្រចិនខាងត្បូង ជាច្រករបៀងពាណិជ្ជកម្មយុទ្ធសាស្ត្រ ដែលប្រទេសទាំង២ មានការទាមទារលើតំបន់ត្រួតស៊ីគ្នា។

បើយោងតាមសេចក្តីថ្លែងការណ៍របស់ក្រសួងការបរទេសចិន បានឲ្យដឹងថា លោក Wang បានប្រាប់សមភាគីហ្វីលីពីន លោក Enrique Manalo រដ្ឋមន្ត្រីការបរទេសហ្វីលីពីន នៅក្នុងការសន្ទនាតាមទូរស័ព្ទ កាលពីថ្ងៃពុធ (ទី២០ ខែធ្នូ) ថា ប្រសិនបើប្រទេសអាស៊ីអាគ្នេយ៍មួយនេះ ធ្វើការវិនិច្ឆ័យខុស ឬឃុបឃិតជាមួយកងកម្លាំងខាងក្រៅ ដោយមាន «ចេតនាមិនល្អ» នៅក្នុងដែនទឹកជម្លោះ នោះប្រទេសចិននឹងការពារសិទ្ធិរបស់ខ្លួន ហើយនិងឆ្លើយតបយ៉ាងម៉ឺងម៉ាត់។

" សេចក្តីថ្លែងការណ៍នោះ បានដកស្រង់សម្តីរបស់លោក Wang ដែលបាននិយាយថា៖ «ទំនាក់ទំនងចិននិងហ្វីលីពីន ស្ថិតនៅផ្លូវបំបែកមួយ។ អាទិភាពចម្បង គឺត្រូវដោះស្រាយ និងគ្រប់គ្រងស្ថានភាពដែនសមុទ្របច្ចុប្បន្នឲ្យបានត្រឹមត្រូវ»។

ណែកលោក Manalo នៅថ្ងៃព្រហស្បតិ៍ (ទី២១ ខែធ្នូ)នេះ បាននិយាយថា លោកមានការផ្លាស់ប្តូរគ្នា ប្រកបដោយភាពស្មោះត្រង់ឥតលាក់លៀមជាមួយលោក Wang។ លោកបានប្រាប់ថា៖ «ពួកយើងទាំង២នាក់ បានកត់សម្គាល់ពីសារៈសំខាន់នៃការសន្ទនា ក្នុងការដោះស្រាយបញ្ហាទាំងនេះ»។

យ៉ាងណាក្ដី ភ្លាមៗនោះ គេមិនទាន់ដឹងច្បាស់ទេថា តើភាគីខាងណាជាអ្នកផ្ដើមការហៅទូរស័ព្ទនេះ។ គួរបញ្ជាក់ថា ប្រទេសចិនទាមទារយកដែនទឹកភាគច្រើន នៅក្នុងអ្វីដែលហៅថា Nine Dash Line (ខ្សែបន្ទាត់ ៩ចំណុច) ដែលក៏ត្រូវបានជំទាស់តវ៉ាដោយប្រទេសប្រ៊ុយណេ ម៉ាឡេស៊ី កោះតៃវ៉ាន់ និងវៀតណាមផងដែរ៕