ប្រធានាធិបតីអ្នកសេរីនិយមរបស់អាហ្សង់ទីនលោក Javier Milei កាលពីថ្ងៃពុធ (ទី២០ ខែធ្នូ) បានចុះហត្ថលេខាលើក្រឹត្យមួយ ដែលបង្ហាញពីកំណែទម្រង់សេដ្ឋកិច្ច ដោយក្នុងនោះមានទាំងការបញ្ចប់នូវការកម្រិតលើការនាំចេញ រួមជាមួយនឹងវិធានការបន្ធូរបន្ថយនិយ័តកម្មនានាផងដែរ ខណៈដែលរដ្ឋាភិបាលថ្មីរបស់លោក កំពុងប្រយុទ្ធតទល់នឹងវិបត្តិសេដ្ឋកិច្ចធ្ងន់ធ្ងរ។

ក្រោយការចុះហត្ថលេខាលើក្រឹត្យនោះ លោក Milei បាននិយាយនៅក្នុងសុន្ទរកថាតាមទូរទស្សន៍ថា៖ «នេះគ្រាន់តែជាជំហានដំបូងប៉ុណ្ណោះ»។ លោកបានបញ្ជាក់បន្ថែមថា៖ «គោលបំណង គឺដើម្បីប្រគល់សេរីភាព និងស្វ័យភាពដល់បុគ្គល ហើយចាប់ផ្តើមរុះរើនិយ័តកម្មជាច្រើន ដែលបានរារាំង បន្ថយល្បឿន និងបញ្ឈប់កំណើនសេដ្ឋកិច្ច»។

ក្នុងចំណោមកំណែទម្រង់ទាំងនោះ មានផែនការធ្វើឯកជនភាវូបនីយកម្មក្រុមហ៊ុនរដ្ឋ ប៉ុន្តែលោក Milei មិនបានប្រាប់ឈ្មោះក្រុមហ៊ុនជាក់លាក់ទេ។ កាលពីមុន លោក Milei ដែលបានពណ៌នាខ្លួនឯងថា អ្នកនយោបាយមូលធននិយម បាននិយាយថា លោកគាំទ្រចំពោះការធ្វើឯកជនភាវូបនីយកម្មនៃក្រុមហ៊ុនប្រេងរបស់រដ្ឋ YPF (YPFD.BA)។

ចាប់តាំងពីការស្បថចូលកាន់តំណែងថ្ងៃដំបូងរបស់លោក កាលពីថ្ងៃទី១០ ខែធ្នូមក លោក Milei បានសន្យាធ្វើការស្ដារឡើងវិញ «ដ៏គួរឲ្យភ្ញាក់ផ្អើល» សម្រាប់សេដ្ឋកិច្ច ក្នុងនោះរួមទាំងការកាត់បន្ថយការចំណាយក្នុងចំនួនដ៏ច្រើន ដែលជាការប៉ុនប៉ងទប់ទល់នឹងអតិផរណា ៣ខ្ទង់របស់ប្រទេស៕