កងទ័ពអ៊ីស្រាអែល នៅថ្ងៃព្រហស្បតិ៍ (ទី២១ ខែធ្នូ) នេះ បានបញ្ចេញវីដេអូ ដែលបង្ហាញពីការវាយប្រហារតាមអាកាសលើអ្វីដែលខ្លួនបាននិយាយថា ជាគោលដៅរបស់ក្រុមហាម៉ាស នៅក្នុងតំបន់ហ្កាហ្សា ហើយជាមួយគ្នានេះ IDF (កងកម្លាំងការពារជាតិអ៊ីស្រាអែល) បាននិយាយថា ខ្លួនក៏បានរកឃើញអាវុធជាច្រើនផងដែរ នៅក្នុងបរិវេណសាលារៀនមួយ។

ទីភ្នាក់ងារសារព័ត៌មាន Reuters មិនអាចផ្ទៀងផ្ទាត់ពីទីតាំង ឬកាលបរិច្ឆេទ ដែលវីដេអូនេះ ត្រូវបានថតដោយឯករាជ្យនោះឡើយ។ ក្នុងសេចក្តីថ្លែងការណ៍ជាលាយលក្ខណ៍អក្សររបស់ខ្លួន IDF បានឲ្យដឹងថា៖ «អំឡុងពេលបំពេញភារកិច្ចរបស់ IDF នៅទីក្រុង Jabalya ទាហានបានអនុញ្ញាតឲ្យមានការជម្លៀសប្រជាជនស៊ីវិល ដោយរបៀបរៀបរយពីបរិវេណសាលាមួយឆ្ពោះទៅភាគខាងត្បូង។ កងទ័ពជើងគោករបស់ IDF បានធ្វើការរុករកនៅក្នុងសាលា ហើយបានរកឃើញអាវុធជាច្រើន នៅទីនោះ»។

ឥឡូវនេះ អ៊ីស្រាអែលបានបើកយុទ្ធនាការរបស់ខ្លួន នៅតំបន់ហ្កាហ្សាស្ទ្រីប អស់រយៈពេលជាង ១០សប្តាហ៍ហើយ ក្នុងគោលបំណងកម្ទេចក្រុមហាម៉ាស បន្ទាប់ពីពួកសកម្មប្រយុទ្ធរបស់ក្រុមនេះ បានវាយឆ្មក់ចូលអ៊ីស្រាអែល កាលពីថ្ងៃទី៧ ខែតុលា។ ហើយបើយោងតាមអ៊ីស្រាអែល ពួកគេបានចាប់ចំណាប់ថ្នូរប្រហែល ២៤០នាក់ និងបានសម្លាប់មនុស្ស ១.២០០នាក់។

ចាប់តាំងពីពេលនោះមក អ៊ីស្រាអែលបានធ្វើការវាយប្រហារផ្លូវគោក និងផ្លូវអាកាសយ៉ាងខ្លាំងក្លា នៅតំបន់មាត់សមុទ្រនេះ។ ហើយការស្លាប់ជិត ២០.០០០នាក់ ត្រូវបានបញ្ជាក់ដោយក្រសួងសុខាភិបាលរបស់តំបន់ហ្កាហ្សា ដោយសពជាច្រើនពាន់នាក់ទៀត ត្រូវបានគេជឿថា ជាប់នៅក្រោមគំនរបាក់បែក៕