ឯកឧត្តមសន្ដិបណ្ឌិត នេត សាវឿន ឧបនាយករដ្ឋមន្ដ្រី និងជាប្រធានអាជ្ញាធរជាតិប្រយុទ្ធប្រឆាំងគ្រឿងញៀន បានបង្ហាញនូវការស្ញប់ស្ញែងចំពោះការលះបង់ និងពលិកម្មរបស់កម្លាំងកងរាជអាវុធហត្ថទាំងអស់ ក្រៅពីការចូលរួមការពារសន្ដិសុខ សណ្ដាប់ធ្នាប់ និងសុវត្ថិភាពសាធារណៈក្នុងសង្គមហើយនោះ ក៏បានដើរតួនាទីយ៉ាងសំខាន់ក្នុងការការពារបូរណភាពទឹកដី និងអធិបតេយ្យជាតិកម្ពុជា។
ការលើកឡើងរបស់ឯកឧត្តមឧបនាយករដ្ឋមន្ដ្រី នេត សាវឿន បានធ្វើឡើងនៅរសៀលថ្ងៃទី២៣ ខែធ្នូ ឆ្នាំ២០២៣នេះ ក្នុងឱកាសអញ្ជើញតំណាងរបស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ដ្រី នៃកម្ពុជា ក្នុងពិធីប្រជុំបូកសរុបសភាពការណ៍ ការអនុវត្តតួនាទីភារកិច្ច និងធ្វើកំណែទម្រង់កងរាជអាវុធហត្ថ ឆ្នាំ២០២៣ ទិសដៅភារកិច្ច និងការងារកំណែទម្រង់កងរាជអាវុធហត្ថឆ្នាំ២០២៤។
ឯកឧត្តមឧបនាយករដ្ឋមន្ដ្រី បានរំលឹកនូវរឿងរ៉ាវដែលលោកចាំមិនភ្លេច ពោលកាលពីឆ្នាំ២០០៨ ពេលដែលកម្ពុជាពើបប្រទះសង្គ្រាមជាមួយប្រទេសជិតខាង កម្លាំងកងរាជអាវុធហត្ថក៏ត្រូវបានបញ្ជូនទៅចុះជួយមុនគេ នៅតំបន់ប្រាសាទព្រះវិហារ ដើម្បីចូលរួមចំណែកការពារខឿនឯករាជ្យ និងអធិបតេយ្យជាតិរបស់កម្ពុជា ដោយមិនអនុញ្ញាតឲ្យបរទេសឈ្លានពានបានឡើយ។
ឯកឧត្តមឧបនាយករដ្ឋមន្ដ្រី លើកឡើងថា «កងរាជអាវុធហត្ថមិនមែនត្រឹមតែ រួមចំណែកការពារសន្ដិសុខ សណ្ដាប់ធ្នាប់ ប្រឆាំងបទល្មើសសង្គមប៉ុណ្ណោះទេ។ កម្លាំងអាវុធហត្ថបានចូលរួមចំណែកការពារបូរណភាពទឹកដី ខ្ញុំចាំមិនភ្លេចនោះទេ កាលពីឆ្នាំ២០០៨ ពេលមានសង្គ្រាមជាមួយប្រទេសជិតខាង កម្លាំងកងរាជអាវុធហត្ថចំនួន២០០នាក់ បានដឹកនាំទៅចុះជួយមុនគេនៅតំបន់ព្រះវិហារ ដូច្នេះមិនមែនត្រឹមតែថែរក្សាសន្ដិសុខសណ្ដាប់ធ្នាប់នោះទេ ពោលបានរួមចំណែកយ៉ាងសកម្មក្នុងការការពារខឿន ឯករាជ្យ និងអធិបតេយ្យភាពរបស់កម្ពុជា»។
ឯកឧត្តមឧបនាយករដ្ឋមន្ដ្រី បានបន្ដទៀតថា កម្លាំងកងរាជអាវុធហត្ថក៏បានរួមចំណែកការពាររាជរដ្ឋាភិបាលស្របច្បាប់យ៉ាងម្មត់ចត់ និងទប់ស្កាត់សកម្មភាពបដិវត្តពណ៌ ដែលកើតឡើងកាលពីពេលកន្លងទៅ។ លោកថា បដិវត្តពណ៌កើតឡើងនៅប្រទេសណា ប្រទេសនោះតែងតែបរាជ័យ តែងតែត្រូវបានផ្ដួលរំលំដោយឡែក នៅកម្ពុជាបដិវត្តពណ៌នោះត្រូវបរាជ័យទៅវិញ។
បន្ថែមពីនេះ កងកម្លាំងកងរាជអាវុធហត្ថ បានចូលរួមសហការបង្ក្រាបបទល្មើសនានាដែលកើតមាន ក្នុងនោះមានទាំងបទល្មើសធនធានធម្មជាតិ, បទល្មើសព្រហ្មទណ្ឌ, បទល្មើសគ្រឿងញៀន, រក្សាសន្ដិសុខ សណ្ដាប់ធ្នាប់សាធារណៈ និងបានចូលរួមយ៉ាងខ្ជាប់ខ្ជួនក្នុងប្រតិបត្តិការការពារព្រឹត្តិការណ៍សំខាន់ៗ ទាំងក្របខ័ណ្ឌជាតិ និងអន្ដរជាតិ ពិសេសកិច្ចប្រជុំកំពូលអាស៊ាន ព្រមទាំងការធ្វើជាម្ចាស់ផ្ទះនៃការប្រកួតកីឡាស៉ីហ្គេមជាដើម។
ជាទិសដៅផែនការសកម្មភាពសម្រាប់ឆ្នាំ២០២៤ ឧបនាយករដ្ឋមន្ដ្រី នេត សាវឿន បានក្រើនរំលឹក និងផ្ដល់អនុសាសន៍មួយចំនួនដល់កងរាជអាវុធហត្ថ ដោយត្រូវបន្ដពង្រឹងនូវការការពារសន្ដិសុខ សណ្ដាប់ធ្នាប់ ស្ថេរភាពសង្គម និងទប់ស្កាត់នូវរាល់ឧបាយកលរបស់ពួកអមិត្តដែលនៅតែបន្ដចិញ្ចឹមចិត្តផ្ដួលរំលំរាជរដ្ឋាភិបាលស្របច្បាប់ ដែលប្រសូត្រចេញពីការបោះឆ្នោតយ៉ាងត្រឹមត្រូវ និងឆន្ទៈរបស់ប្រជាពលរដ្ឋយ៉ាងពិតប្រាកដ។
ជាមួយគ្នានេះ ឧបនាយករដ្ឋមន្ដ្រី នេត សាវឿន ជំរុញឲ្យបង្កើនសមត្ថភាពហ្វឹកហ្វឺន វិជ្ជាជីវៈ និងជំនាញឯកទេសបន្ថែមលើអ្វីដែលកំពុងអនុវត្តបានយ៉ាងល្អនាពេលបច្ចុប្បន្ននេះ។ បន្ថែមពីនេះត្រូវមានការលើកសរសើរ ផ្ដល់រង្វាន់លើកទឹកចិត្តចំពោះមន្ដ្រីដែលបំពេញតួនាទីភារកិច្ចបានល្អ និងអនុវត្តវិន័យចំពោះអ្នកដែលប្រព្រឹត្តខុស ខណៈមេបញ្ជាការគ្រប់ជាន់ថ្នាក់ត្រូវធ្វើជាគំរូដល់មន្ដ្រីក្រោមឱវាទរបស់ខ្លួន៕ អត្ថបទ៖ បាន ចក់
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
