ភ្នំពេញ ៖ ដើម្បីជួយសម្រួលម្ចាស់អាជីវកម្មក្នុងវិស័យទេសចរណ៍ កាត់បន្ថយការចំណាយថ្លៃធ្វើអាជ្ញាប័ណ្ណដឹកជញ្ជូនភ្ញៀវទេសចរច្រើនកន្លែង ចាប់ពីថ្ងៃទី១ ខែកក្កដា ឆ្នាំ២០២១នេះតទៅ គ្រប់អាជីវកម្មដឹកជញ្ជូនតាមផ្លូវគោក និងផ្លូវទឹកទាំងអស់ ដែលមានអាជ្ញាប័ណ្ណប្រកបអាជីវកម្មដឹកជញ្ជូនអ្នកដំណើរពីក្រសួងសាធារណៈការ និងដឹកជញ្ជូនរួចហើយ គឺអាចប្រកបអាជីវកម្មដឹកជញ្ជូនភ្ញៀវទេសចរជាតិ និងអន្តរជាតិ នៅក្នុងវិស័យទេសចរណ៍បានផងដែរ។
បើតាមការបញ្ជាក់ពីឯកឧត្តម តុប សុភ័គ រដ្ឋលេខាធិការ និងជាអ្នកនាំពាក្យក្រសួងទេសចរណ៍ បានថ្លែងប្រាប់ BTV នៅថ្ងៃទី១៩ ខែមិថុនានេះថា នៅពេលកន្លងមកនេះ គ្រប់អាជីវកម្មដឹកជញ្ជូនតាមផ្លូវគោក និងផ្លូវទឹកទាំងអស់ នៅពេលដែលគេមានលិខិតអនុញ្ញាតដឹកជញ្ជូនអ្នកដំណើរពីក្រសួងសាធារណការ និងដឹកជញ្ជូនរួចហើយ ហើយប្រសិនបើគេចង់ពង្រីកអាជីវកម្មប្រកបរបរដឹកជញ្ជូនភ្ញៀវទេសចរបន្ថែមទៀត គឺម្ចាស់អាជីវកម្មនោះត្រូវទៅសុំធ្វើអាជ្ញាប័ណ្ណប្រកបអាជីវកម្មដឹកជញ្ជូនភ្ញៀវទេសចរបន្ថែមទៀតពីក្រសួងទេសចរណ៍។
ឯកឧត្តម តុប សុភ័គ ថ្លែងថា ប៉ុន្តែនៅពេលថ្មីនេះ ដោយសារយើងមានសារាចរពីរាជរដ្ឋាភិបាល និងដើម្បីជួយសម្រួលដល់អាជីវកម្មធុនតូចធុនមធ្យមដែលផ្តល់សេវាកម្មដឹកជញ្ជូនទេសចរណ៍តាមផ្លូវទឹកផ្លូវគោគនោះ កុំអោយមានការសុំអាជ្ញាប័ណ្ណច្រើនកន្លែង ដូចនេះ រាជរដ្ឋាភិបាល ក៏បានសម្រេចអោយតែក្រសួងសាធារណការ និងដឹកជញ្ជូនជាអ្នកផ្តល់អាជ្ញាប័ណ្ណដឹកជញ្ជូនទេសចរណ៍នោះវិញ។
តាមសេចក្តីជូនដំណឹងរបស់ក្រសួងទេសចរណ៍នៅថ្ងៃទី១៧ ខែមិថុនានេះ ក៏បានចេញផ្សាយដែរថា ក្រសួងទេសចរណ៍នឹងបញ្ឈប់ការចេញអាជ្ញាប័ណ្ណទេសចរណ៍ ដល់ម្ចាស់អាជីវកម្មដឹកជញ្ជូនទេសចរណ៍តាមផ្លូវគោក និងផ្លូវទឹកចាប់ពីថ្ងៃទី១ ខែកក្កដា ឆ្នាំ២០២១តទៅ ប៉ុន្តែសម្រាប់ម្ចាស់អាជីវកម្មដឹកជញ្ជូនទេសចរណ៍តាមផ្លូវគោក ផ្លូវទឹកណាពង្រឹងគុណភាពសេវាកម្មដឹកជញ្ជូនទេសចរណ៍ គឺអាចស្នើចូលរួមផ្តល់ការបណ្តុះបណ្តាល និងដាក់ពាក្យចូលរួមប្រឡងប្រណាំងផ្សេងៗនៅកម្រិតថ្នាក់ជាតិ និងថ្នាក់តំបន់តាមរយៈក្រសួងទេសចរណ៍។
បើតាមការបញ្ជាក់ពីឯកឧត្តម វ៉ាស៊ីម សូរិយា អ្នកនាំពាក្យក្រសួងសាធារណៈការ និងដឹកជញ្ជូន បានឲ្យដឹងថា ក្រសួងសាធារណៈការ មិនមានការផ្លាស់ប្តូរនីតីវិធី នៃការផ្តល់អាជ្ញាប័ណ្ណជូនម្ចាស់អាជីវកម្មដឹកអ្នកដំណើរនោះទេ ពោលគឺ គ្រប់អាជ្ញាប័ណ្ណដឹកជញ្ជូនអ្នកដំណើរទូទៅក្តី និងដឹកជញ្ជូនទេសចរណ៍ក្តី តាមមធ្យោបាយផ្លូវគោក និងផ្លូវទឹក គឺត្រូវធ្វើបន្តសុពលភាពធ្វើអាជ្ញាប័ណ្ណរៀងរាល់មួយឆ្នាំម្តងដូចៗគ្នា៕
អត្ថបទ ៖ ស៊ុម សុខជា