យោធាអ៊ីស្រាអែលបាននិយាយកាលពីថ្ងៃអាទិត្យ (២៤ ធ្នូ) ថាចំណាប់ថ្នូរជនជាតិអ៊ីស្រាអែល ៥​នាក់ ត្រូវបានសម្លាប់នៅក្នុងការចាប់ជាឈ្លើយសឹករបស់ក្រុមហាម៉ាស ហើយ​សាកសព​របស់​ពួក​គេ​ត្រូវ​បាន​រកឃើញក្នុងបណ្តាញផ្លូវរូងក្រោមដីនៅភាគខាងជើងតំបន់ហ្កាហ្សាស្ទ្រីប ដោយ​បង្ហាញ​រូប​ភាព​នៃបន្ទប់ទឹក និងបន្ទប់ធ្វើការដែលធ្វើពីដីឥដ្ឋពណ៌ស ដែលភ្ជាប់ដោយផ្លូវបេតុងដ៏ងងឹត។

ការ​ប្រកាសនេះបានបន្សល់ទុកនូវសំណួរថាតើពួកគេបានស្លាប់ដោយរបៀបណា ខណៈ​អ្នក​នាំ​ពាក្យ​យោធា​ជាន់ខ្ពស់ លោកឧត្តមនាវីឯក ដានីញ៉ែល ហាហ្ការី (Daniel Hagari) បាន​និយាយ​ថា របាយការណ៍ក្រោយការធ្វើកោសល្យវិច័យជិតចេញលទ្ធផលហើយ។

លោក​បាន​បាននិយាយថា «យើងនឹងធ្វើការសង្ខេបដល់ក្រុមគ្រួសារជនរងគ្រោះ ហើយ​បន្ទាប់​មក​អាស្រ័យ​លើ​អ្វីដែលពួកគេយល់ស្របជាសាធារណៈ»។

អ្នក​ដែលបានស្លាប់នោះរួមមាន ទាហាន ៣នាក់ និងជនស៊ីវិល ២នាក់ ដែល​ស្ថិត​ក្នុង​ចំណោម​មនុស្ស ២៤០នាក់ ដែលត្រូវបានខ្មាន់កាំភ្លើងក្រុមហាម៉ាស ចាប់ខ្លួនត្រឡប់ទៅតំបន់ហ្កាហ្សាស្ទ្រីប អំឡុង​ពេលការវាយលុកឆ្លងព្រំដែនកាលពីថ្ងៃទី០៧ ខែតុលា ដែលបង្ក​ឱ្យ​មាន​សង្រ្គាម​ដ៏​តាន​តឹង​នេះ​។ យោធាបានប្រកាសពីការធ្វើមាតុភូមិនិវត្តន៍សាកសពរបស់ពួកគេនៅដើមខែនេះ។

ការ​ប្រកាសរបស់យោធាកាលពីថ្ងៃអាទិត្យនេះ បានកើតឡើងនៅពេលដែលលោកនាយករដ្ឋមន្រ្តី បេនចាមីន ណេតាន់យ៉ាហ៊ូ (Benjamin Netanyahu) បាននិយាយថាអ៊ីស្រាអែល នឹង​ធ្វើ​ឱ្យ​ប្រតិបត្តិការ​កាន់តែស៊ីជម្រៅនៅក្នុងសង្គ្រាមដែលមានរយៈពេលជិត ១២សប្តាហ៍ ដែល​ចំនួន​អ្នក​ស្លាប់​ជន​ស៊ីវិលនៅតំបន់ហ្កាហ្សា បានធ្វើឱ្យមហាអំណាចលោកខាងលិចមិនពេញចិត្តជាខ្លាំង រួម​ទាំង​ការ​ព្រួយ​បារម្ភពីចំណាប់ថ្នូរដែលនៅសេសសល់ចំនួន ១២៩នាក់ នៅតំបន់ហ្កាហ្សា៕