ទួរគីនិយាយនៅថ្ងៃចន្ទនេះថា កងទ័ពអកាសរបស់ខ្លួន បានសម្លាប់ក្រុមជីវពលឃើដចំនួន ២៦នាក់ អំឡុងការវាយប្រហារតាមច្រកអាកាសរបស់ពួកគេនៅប្រទេសអ៊ីរ៉ាក់ និងប្រទេសស៊ីរី ជាការឆ្លើយតបនឹងការសម្លាប់ទាហានរបស់ពួកគេ ១២នាក់ កាលពីចុងសប្តាហ៍កន្លងទៅ ហើយពួកគេបានធ្វើការឃាត់ខ្លួនក្រុមមន្រ្តីប្រឆាំងដែលគាំទ្រក្រុមជីវពលឃើដរាប់សិបនាក់ផងដែរ ។ 

ក្រសួងការពារជាតិទួរគី បាននិយាយថា កាលពីថ្ងៃសៅរ៍កន្លងទៅ កងកម្លាំងទ័ពអាកាសរបស់ប្រទេសទួរគី បានធ្វើការវាយប្រហារតាមច្រកអាកាសនៅភាគខាងជើងប្រទេសអ៊ីរ៉ាក់ និងស៊ីរី ហើយបានបំផ្លាញគោលដៅចំនួន ២៩ទីតាំងរបស់គណបក្សពលករឃើដ (PKK) ។ 

រដ្ឋមន្ត្រីការពារជាតិទួរគី លោក Yasar Guler និយាយថា កងកម្លាំងទួរគីបានសម្លាប់ក្រុមសកម្មប្រយុទ្ធរបស់បក្សពលករឃើដ ចំនួន៣០នាក់ នៅភាគខាងជើងប្រទេសអ៊ីរ៉ាក់ ធ្វើឲ្យចំនួនក្រុមជីវពលស្លាប់ចាប់តាំងពីចុងសប្តាហ៍ រហូតមកទល់នឹងពេលនេះ កើនឡើងដល់ ៥៦នាក់ ។ 

សូមបញ្ជាក់ថា គណបក្ស PKK ដែលត្រូវបានគេចាត់ទុកថាជាក្រុមភេរវកម្មដោយទួរគី សហរដ្ឋអាមេរិក និងសហភាពអឺរ៉ុប បានក្រោកឈរកាន់អាវុធប្រឆាំងរដ្ឋទួរគី ចាប់តាំងពីឆ្នាំ ១៩៨៤រហូតមក ៕