គម្រោងរបស់ក្រុមតាលីបង់អាហ្វហ្គានីស្ថាន ដើម្បីសាងសង់ទំនប់វារីអគ្គិសនី នៅលើទន្លេដ៏សំខាន់មួយនៅ ប្រទេសអាហ្វហ្គានីស្ថានភាគខាងកើត បានធ្វើឲ្យមានការព្រួយបារម្ភ នៅក្នុងប្រទេសប៉ាគីស្ថាន ដែលនៅជិតខាង។

អ្នកនាំពាក្យក្រសួងធនធានទឹក និងថាមពលរបស់តាលីបង់ បាននិយាយ កាលពីថ្ងៃទី១៨ ខែធ្នូថា៖«ការស្ទង់មតិ និងការរៀបគម្រោង បានបញ្ចប់ហើយ»។ លោក Matiullah Abid បានប្រាប់វិទ្យុ RFE/RL Azadi ថា ការសាងសង់ទំនប់ នៅលើទន្លេ Kunar នឹងចាប់ផ្តើម នៅពេលដែល «មានមូលនិធិ» ។

រដ្ឋមន្ត្រីខេត្តប៉ាគីស្ថានម្នាក់ បាននិយាយថា ការសម្រេចចិត្តឯកតោភាគីដោយក្រុមតាលីបង់ ក្នុងការសាងសង់ទំនប់នេះ នឹងត្រូវចាត់ទុកថា ជាទង្វើអរិភាពប្រឆាំងនឹងប៉ាគីស្ថាន។

លោក Jan Achakzai រដ្ឋមន្ត្រីក្រសួងព័ត៌មាននៅខេត្ត Balochistan ភាគនិរតី បានព្រមានអំពី «ផលវិបាកធ្ងន់ធ្ងរ» រួមទាំង «ការកើនឡើងភាពតានតឹង និងជម្លោះ ដែលអាចកើតមាន»។

ទន្លេ Kunar មានប្រវែង ៤៨០គីឡូម៉ែត្រ មានប្រភពចេញពីភ្នំ Hindu Kush នៅភាគឦសានប្រទេសអាហ្វហ្គានីស្ថាន ហើយហូរបញ្ចូលគ្នាជាមួយទន្លេ Kabul មុនពេលហូរចុះទៅកាន់ប្រទេសប៉ាគីស្ថាន។