នាយករដ្ឋមន្ត្រីអ៊ីស្រាអែល លោក Benjamin Netanyahu បានគូសបញ្ជាក់ពីតម្រូវការជាចាំបាច់ចំនួន ៣ ដើម្បីសម្រេចបានសន្តិភាព ក្នុងសង្គ្រាមរបស់ខ្លួនជាមួយក្រុមហាម៉ាស ដូចជាការកម្ចាត់ក្រុមហាម៉ាស ការគ្មានយោធា នៅតំបន់ហ្កាហ្សា និងសង្គមប៉ាឡេស្ទីន ដែល«មិនត្រូវបានបំផ្លាញ»។

ការអត្ថាធិប្បាយ ដែលបានធ្វើឡើងនៅក្នុងទំព័រសារព័ត៌មាន Wall Street Journal ដែលត្រូវបានចេញផ្សាយនៅថ្ងៃទី២៥ ខែធ្នូ កើតឡើងចំពេលមានការកើនឡើងនូវសម្ពាធលើអ៊ីស្រាអែលឲ្យកាត់បន្ថយជម្លោះ នៅតំបន់ហ្កាហ្សា ដែលបានចាប់ផ្តើមឡើង បន្ទាប់ពីមានការវាយលុក កាលពីថ្ងៃទី៧ ខែតុលា របស់ពួកហាម៉ាសលើសហគមន៍អ៊ីស្រាអែលភាគខាងត្បូង ដោយការវាយប្រហារយ៉ាងកំរោលនោះបានសម្លាប់មនុស្ស ១.២០០នាក់ និងការចាប់ខ្លួនជនជាតិអ៊ីស្រាអែលជាច្រើននាក់ទៀតជាចំណាប់ថ្នូរ។

លោក Netanyahu បានសរសេរថា៖ «ក្នុងប្រតិបត្តិការកម្ទេចក្រុមហាម៉ាស អ៊ីស្រាអែលនឹងបន្តធ្វើដោយគោរពតាមច្បាប់អន្តរជាតិ» ដោយលោកបានបញ្ជាក់បន្ថែមថា ការលុបបំបាត់ក្រុមហាម៉ាស គឺជាការឆ្លើយតបសមាមាត្រតែមួយគត់ ដើម្បីទប់ស្កាត់ការកើតឡើងម្តងទៀតនៃអំពើឃោរឃៅគួរឲ្យរន្ធត់បែបនេះ។

សូមបញ្ជាក់ថា យោងតាមក្រសួងសុខាភិបាល ដែលគ្រប់គ្រងដោយក្រុមហាម៉ាស បានឲ្យដឹងថា មនុស្សជាង ២០.០០០នាក់ហើយ ត្រូវបានសម្លាប់នៅតំបន់ហ្កាហ្សា តាំងពីសង្រ្គាម ចាប់ផ្ដើមផ្ទុះឡើង។ ភាគច្រើននៃតំបន់ហ៊ុមព័ទ្ធប៉ាឡេស្ទីន ត្រូវបានបំផ្លិចបំផ្លាញដោយការវាយប្រហារតាមអាកាសរបស់អ៊ីស្រាអែល ហើយអង្គការសហប្រជាជាតិ បាននិយាយថា ស្ថានភាពមនុស្សធម៌ គឺកាន់តែអាក្រក់ទៅៗហើយ។

លោក Netanyahu បាននិយាយម្តងហើយម្តងទៀតថា សង្រ្គាមនឹងអូសបន្លាយរយៈពេលវែង តាមដែលត្រូវការ ដើម្បីកម្ចាត់ក្រុមហាម៉ាស ហើយលោក និងគណៈរដ្ឋមន្ត្រីរបស់លោក ក៏មិនបានកំណត់ពេលវេលាអំពីរយៈពេលនៃការប្រយុទ្ធគ្នាដ៏ខ្លាំងក្លា ឬពីការមានសង្រ្គាមកាន់តែទូលំទូលាយនោះដែរ៕