រដ្ឋមន្រ្តីការពារជាតិរុស្ស៊ីលោក Sergei Shoigu បាននិយាយប្រាប់លោកប្រធានាធិបតី Vladimir Putin ថា កងកម្លាំងរុស្ស៊ី ដណ្តើមគ្រប់គ្រងបានទាំងស្រុងទីក្រុង Maryinka ស្ថិតនៅភាគខាងកើតប្រទេសអ៊ុយក្រែនដែលជាការដណ្តើមបានការគ្រប់គ្រងទឹកដីអ៊ុយក្រែនទ្រង់ទ្រាយធំ ចាប់តាំងពីដណ្តើមបានទីក្រុង Bakhmut កាលពីខែឧសភា ។

ទីក្រុង Maryinka ស្ថិតនៅភាគនិរតីនៃតំបន់ភាគកណ្តាល Donetskដែលគ្រប់គ្រងដោយរុស្ស៊ី ត្រូវបានគេចាត់ទុកថាជាទីក្រុងខ្មោចរួចទៅហើយ ។

លោក Putin និយាយថា ការគ្រប់គ្រងទីក្រុង Maryinka ដែលធ្លាប់មានពលរដ្ឋរស់នៅ ១ម៉ឺននាក់ នឹងអនុញ្ញាតឲ្យកងកម្លាំងរុស្ស៊ីរុញច្រានអង្គភាពប្រយុទ្ធរបស់សត្រូវចេញពីតំបន់ Donetsk ។

លោកបាននិយាយអំឡុងជំនួបតាម Video Conference ជាមួយលោក Shoigu ថា បច្ចុប្បន្នទាហានរបស់ពួកយើង មានឱកាសឈានដល់តំបន់ប្រតិបត្តិការសឹកទ្រង់ទ្រាយធំជាងមុន ។

សូមបញ្ជាក់ថា ជោគជ័យធំចុងក្រោយគេរបស់រុស្ស៊ីនៅលើសមរភូមិប្រយុទ្ធ គឺការដណ្តើមបានគ្រប់គ្រងទីក្រុង Bakhmut កាលពីខែឧសភា ដែលស្ថិតក្នុងចំណោមទីក្រុងប្រយុទ្ធបង្ហូរឈាមគ្នាខ្លាំងបំផុត ។

អ៊ុយក្រែន បានចាប់ផ្តើមវាយបកវិញកាលពីខែមិថុនា ដោយមានគោលដៅដណ្តើមមកវិញតំបន់ភាគខាងត្បូង និងតំបន់ភាគខាងកើតអ៊ុយក្រែន រួមទាំងទីក្រុង Bakhmut ផងដែរ ។

ទោះបីជាយ៉ាងណាក៏ដោយ កងកម្លាំងអ៊ុយក្រែន បានរុលទៅមុខតិចតួចប៉ុណ្ណោះ អំឡុងការវាយបករបស់ពួកគេ ពេលដែលមានការទប់ទល់មកវិញរបស់កងកម្លាំងរុស្ស៊ី ។

ម្យ៉ាងវិញទៀត ទាហានរុស្ស៊ី បានបង្កើនការវាយប្រហាររបស់ខ្លួនផងដែរតាមជើងគោក និងតាមជើងអាកាសលើទីក្រុង Avdiivka ចាប់តាំងពីពាក់កណ្តាលខែតុលារហូតមក ៕