ក្រសួងការបរទេសចិន នៅថ្ងៃអង្គារ (ទី២៦ ខែធ្នូ) នេះ បាននិយាយថា ការចូលរួមរបស់ចិន នៅក្នុងគម្រោងឧស្ម័នធម្មជាតិរាវ Arctic LNG-2 របស់រុស្ស៊ី មិនគួរក្លាយជាគោលដៅនៃការធ្វើអន្តរាគមន៍ ឬការរឹតត្បិតរបស់ភាគីទី៣ ណាមួយនោះឡើយ។

ការអត្ថាធិប្បាយនេះត្រូវបានធ្វើឡើង ដើម្បីឆ្លើយតបទៅនឹងការដាក់ទណ្ឌកម្មរបស់សហរដ្ឋអាមេរិកលើគម្រោង Arctic LNG-2 កាលពីខែវិច្ឆិកា ដែលជាផ្នែកមួយនៃកញ្ចប់វិធានការថ្មីដ៏ទូលំទូលាយប្រឆាំងនឹងទីក្រុងមូស្គូ ជុំវិញសង្គ្រាម នៅប្រទេសអ៊ុយក្រែន។ យោងតាមប្រភពនានា បានឲ្យដឹងថា ម្ចាស់ភាគហ៊ុនគ្រប់គ្រងរបស់រុស្ស៊ី គឺក្រុមហ៊ុន Novatek បានប្រកាសពីប្រធានសក្ដិ ដោយសារតែការដាក់ទណ្ឌកម្មរបស់សហរដ្ឋអាមេរិក។

សារព័ត៌មានរុស្ស៊ី Kommersant បានរាយការណ៍ កាលពីថ្ងៃចន្ទ (ទី២៥ ខែធ្នូ) ថា ក្រុមហ៊ុនប្រេងធំៗ ដែលគ្រប់គ្រងដោយរដ្ឋរបស់ប្រទេសចិន China National Offshore Oil Corperation (CNOOC) និង China National Petroleum Corp (CNPC) ដែលជាភាគីពាក់ព័ន្ធទាំង២ ក៏បានប្រកាសពីប្រធានសក្ដិ នៅក្នុងគម្រោងនេះផងដែរ។

គម្រោង Arctic LNG-2 គ្រោងនឹងចាប់ផ្តើមការផលិត នៅដើមឆ្នាំ២០២៤។ ក្រុមហ៊ុន Novatek កាន់កាប់ភាគហ៊ុន ៦០ភាគរយ នៅក្នុងគម្រោងនេះ ខណៈដែលក្រុមហ៊ុន CNOOC និង CNPC មានភាគហ៊ុន ១០ភាគរយរៀងខ្លួនៗ ដូចនឹងក្រុមហ៊ុន TotalEnergies របស់ប្រទេសបារាំង និងសម្ព័ន្ធក្រុមហ៊ុន Mitsui & Co និង JOGMEC (ក្រុមហ៊ុនជប៉ុន ដើម្បីសុវត្ថិភាពលោហៈ និងថាមពល) របស់ប្រទេសជប៉ុន៕