មន្ត្រីទួរគីម្នាក់បាននិយាយកាលពីថ្ងៃអង្គារ (២៦ ធ្នូ) ថាប្រធានាធិបតីអ៊ីរ៉ង់ លោក អ៊ីប្រាហ៊ីម រ៉ៃស៊ី (Ebrahim Raisi) នឹងធ្វើទស្សនកិច្ចនៅទីក្រុងអង់ការ៉ា នៅថ្ងៃទី០៤ ខែមករា ខាងមុខនេះ ដើម្បី​ជួប​ជា​មួយ​សមភាគីទួរគីលោក ថាយីប អឺដូហ្កាន់ (Tayyip Erdogan) សម្រាប់​កិច្ច​ពិភាក្សា​ដែល​ទំនង​ជា​ផ្តោត​លើស្ថានភាពនៅក្នុងតំបន់ហ្កាហ្សា និងស៊ីរី ក៏ដូចជាទំនាក់ទំនងទ្វេភាគី។

មន្ត្រីដដែលនោះបាននិយាយថា ដំណើរទស្សនកិច្ចដែលបានគ្រោងទុកដោយលោក Raisi នៅ​ចុង​ខែវិច្ឆិកា ត្រូវបានពន្យារពេល ដោយសារ​តែ​កាល​វិភាគ​មិន​ស្រប​គ្នារ​បស់​រដ្ឋ​មន្ត្រី​ការ​បរទេស​នៃ​មហា​អំណាច​ក្នុងតំបន់ទាំងពីរនេះ។ នៅពេលនោះ រដ្ឋមន្ត្រីការបរទេសទួរគី ស្ថិតនៅ​ក្នុង​ទី​ក្រុង​ញូវយ៉ក ដែលជាផ្នែកមួយនៃ «ក្រុមទំនាក់ទំនង» នៃបណ្តាប្រទេសមូស្លីម ស្ដីពីតំបន់ហ្កាហ្សា។

ប្រទេសទួរគី ដែលគាំទ្រដំណោះស្រាយរដ្ឋពីរចំពោះជម្លោះអ៊ីស្រាអែល-ប៉ាឡេស្ទីន ដែល​មាន​អាយុ​កាល​​រាប់ទស្សវត្សនេះ បានរិះគន់អ៊ីស្រាអែល យ៉ាងចាស់ដៃ​ចំពោះ​ការ​វាយ​ប្រហារ​របស់​ខ្លួន​លើ​តំបន់​ហ្កាហ្សា និងបានអំពាវនាវឱ្យមានបទឈប់បាញ់ជាបន្ទាន់ ហើយ​បាន​និយាយ​ថា​មេ​ដឹក​នាំ​អ៊ីស្រាអែល គួរតែត្រូវបានកាត់ទោសនៅក្នុងតុលាការអន្តរជាតិសម្រាប់ឧក្រិដ្ឋកម្មសង្គ្រាម។

មិន​ដូចសម្ព័ន្ធមិត្តលោកខាងលិច និងប្រទេសអារ៉ាប់មួយចំនួនទេ សមាជិកណាតូទួរគី មួយ​នេះ​មិន​ចាត់​ទុកក្រុមហាម៉ាស ជាក្រុមភេរវជនឡើយ។ ប្រទេសជិតខាងរបស់ខ្លួននៅភាគខាងកើត គឺ​អ៊ីរ៉ង់ បានសម្តែងការគាំទ្រដល់ក្រុមហាម៉ាស និងបានព្រមានអំពីផលវិបាកកាន់តែទូលំទូលាយ ប្រសិន​បើការប្រយុទ្ធគ្នានៅតំបន់ហ្កាហ្សា នៅតែបន្ត៕