ឧត្តរមានជ័យ៖ នៅព្រឹកថ្ងៃទី២៧ធ្នូឆ្នាំ២០២៣នេះ រដ្ឋបាលខេត្តឧត្តរមានជ័យ ប្រារព្ធពិធីអបអរ​ទិវា​ប្រយុទ្ធប្រឆាំងអំពើជួញដូរមនុស្ស ១២ធ្នូ ឆ្នាំ២០២៣ របស់គណៈកម្មាធិការប្រយុទ្ធប្រឆាំង​អំពើជួញដូរ​មនុស្ស​ខេត្តឧត្តរមានជ័យខួបលើកទី១៧ «ក្រោមប្រធានបទបច្ចេកវិទ្យាមធ្យោបាយ ដើម្បីអភិវឌ្ឍន៍ជាតិមិនមែនជួញដូរមនុស្ស» ។

ក្នុងពិធីនោះដែរឯកឧត្តម ប៉ែន កុសល្យ អភិបាលខេត្តឧត្តរមានជ័យ និង​ជា​ប្រធាន​គណៈកម្មាធិការ​ប្រយុទ្ធប្រឆាំង​អំពើ​ជួញដូរ​មនុស្ស​ខេត្តឧត្តរមានជ័យ បាន​មាន​ប្រសាសន៍​ថា គោលបំណង​នៃ​ទិវា​នេះ ​ដើម្បី​ផ្សព្វផ្សាយ​ឲ្យមានការ​យល់​ដឹង​កាន់​តែ​ទូលំទូលាយ​អំពី​កិច្ច​ខិតខំ​ប្រឹងប្រែង​របស់​រាជរដ្ឋាភិបាល​កម្ពុជា ក្នុងការប្រយុទ្ធប្រឆាំងអំពើជួញដូរ​មនុស្ស​គ្រប់​ទម្រង់​ដែលបង្កើតឡើង​ដោយ​ជនល្មើស​ដែលមាន​ល្បិចកល​ពិសពុល​​ប្រកប​ដោយ​គ្រោះថ្នាក់ ​និង​ធ្វើ​ឱ្យ​មនុស្សជាច្រើននាក់​បានធ្លាក់ចូលក្នុង​អន្ទាក់​នៃ​អំពើ​ជួញដូរមនុស្ស និងការ​កេងប្រវ័ញ្ច​យ៉ាង​សាហាវ​ឃោរឃៅ លើ​គ្រប់រូបភាព។

ឯកឧត្តម បានបន្តថា កត្តា​ទាំងអស់នេះ គប្បី​បងប្អូន ក៏ដូច​ជា​ប្អូនៗ​សិស្សានុសិស្ស ដែល​កំពុងសិស្សា ត្រូវប្រើប្រាស់ប្រព័ន្ធបច្ចេកវិឡា​ សម័យទំនើបឌីជីថលនេះ ​ដោយមានការ​ប្រុង​ប្រយ័ត្នខ្ពស់ ​ព្រោះបច្ចុប្បន្ននេះ ការជួញដូរមនុស្សមានគ្រប់រូបភាពលើការប្រើប្រាស់ប្រព័ន្ធទូរស័ព្ទ ដែលងាយនឹងចាញ់បោក​ដោយការ​លោងលោម​ពី​ជនល្មើស​ដោយប្រការណាមួយ ត្រូវ​ប្រញាប់​រាយការណ៍​មកមន្រ្តី​ជំនាញ​ស្ថាប័នពាក់ព័ន្ធ ដើម្បីទប់ស្កាត់ និងអាចជួយដោះស្រាយ​រាល់​បញ្ហា​ប្រឈមនានា ​ជូន​បងប្អូន​កូនក្មួយ​បានទាន់ពេលវេលា​ផងដែរ​៕ អត្ថបទ ឃិន សារិទ្ធ