សំណុំអ័ព្ទដ៏ក្រាស់ បានបន្តគ្របដណ្តប់ទីក្រុងនានា នៅភាគខាងជើងប្រទេសឥណ្ឌា នៅព្រឹកថ្ងៃព្រហស្បតិ៍ (ទី២៨ ខែធ្នូ) ដែលរំខានដល់ការធ្វើដំណើរ នាពេលព្រឹក និងរាំងស្ទះដល់គ្រោងការដឹកជញ្ជូននានា។

នៅក្នុងខ្សែវីដេអូដែលថតដោយទីភ្នាក់ងារសារព័ត៌មាន ANI គេមើលឃើញថា ស្ទើរតែគ្មានការធ្វើចរាចរណ៍ នៅតាមដងផ្លូវ ក្នុងទីក្រុង Gorakhpur និង Srinagar ខណៈដែលវិមានអនុស្សាវរីយ៍សង្គ្រាមឥណ្ឌា ក្នុងរដ្ឋធានីញូវដែលី ត្រូវបានបាំងបាត់ស្ទើរតែទាំងស្រុងដោយអ័ព្ទ នាពេលព្រឹកព្រលឹម។

អ្នកដំណើរតាមរថភ្លើងម្នាក់ ក្នុងទីក្រុងញូវដែលី បាននិយាយថា លោកបានមកដល់ស្ថានីយរថភ្លើងយឺត ២ម៉ោង ដោយសារអ័ព្ទ ខណៈដែលអ្នកដំណើរផ្សេងទៀត បានអង្គុយឃ្លុំភួយ នៅខាងក្រៅស្ថានីយ។

តាមរយៈការធ្វើបច្ចុប្បន្នភាពនៅលើវេទិកាបណ្ដាញសង្គម X នៅរសៀលថ្ងៃព្រហស្បតិ៍នេះ នាយកដ្ឋានឧតុនិយមឥណ្ឌា បានឲ្យដឹងថា សំណុំអ័ព្ទដ៏ក្រាស់នេះ ទំនងជាបន្តកើតមានលើផ្នែកខ្លះនៃភាគពាយព្យ និងភាគកណ្តាលនៃប្រទេសឥណ្ឌា ក្នុងរយៈពេល ៣ថ្ងៃខាងមុខ៕