លោកបេនចាមីន ណេតាន់យ៉ាហូ (Benjamin Netanyahu) បាន​និយាយ​នៅ​ក្នុង​ការ​ប៉ះ​ទង្គិច​ជា​មួយ​លោក រ៉េសិប តាយីប អេរដូហ្គែន (Recep Tayyip Erdogan) អំពីសង្គ្រាម​នៅ​តំបន់​ហ្កាហ្សាថា កងកម្លាំងការពារអ៊ីស្រាអែល (IDF) គឺជាកងទ័ពដែល​មាន​សីលធម៌​បំផុត​នៅ​ក្នុង​ពិភព​លោក ខណៈពេលដែលប្រទេសទួរគី កំពុងប្រព្រឹត្តអំពើប្រល័យពូជសាសន៍។ 

លោក​នាយករដ្ឋមន្ត្រីអ៊ីស្រាអែល បានចោទ​ប្រកាន់​លោក​អេរដូហ្គែន​ពី​បទ​ឧក្រិដ្ឋកម្មប្រ​ឆាំង​នឹង​ជន​ជាតិ​ឃើដ ហើយបានបិទបាំងកំណត់ត្រាអំពីអ្នកកាសែតជាច្រើន បន្ទាប់ពី​ប្រធានាធិបតី​ទួរ​គី​រូប​ បាននិយាយថា លោកណេតាន់យ៉ាហ៊ូមិនខុសពី លោក អាដូហ្វ ហ៊ីតែ្លរ(Adolf Hitler) នោះ​ទេ​។

លោកណេតាន់យ៉ាហ៊ូ បាននិយាយថា លោកអេរដូហ្គែន គឺជា «មនុស្ស​ចុង​ក្រោយ​ដែល​អាច​ផ្សព្វ​ផ្សាយ​សីលធម៌​ដល់យើង»។

លោកបាន​និយាយទៀតថា កម្លាំងការពារអ៊ីស្រាអែល ដែលជាកងទ័ព​ដែល​មាន​សីលធម៌​បំផុត​នៅ​ក្នុង​ពិភព​លោក កំពុងប្រយុទ្ធដើម្បីលុបបំបាត់អង្គការភេរវករ ដែលគួរឲ្យស្អប់ខ្ពើម និង​ឃោរ​ឃៅ​បំផុត​ នៅក្នុងពិភពលោក គឺក្រុមហាម៉ាស-អាយស៊ីស (Hamas-Isis) ដែល​បាន​ប្រព្រឹត្ត​ឧក្រិដ្ឋកម្ម​ប្រឆាំង​នឹងមនុស្សជាតិ ហើយដែលលោកអេរដូហ្កែន បានសរសើរ និង​មេដឹ​ក​នាំ​របស់​ក្រុម​នះ ដែលលោកបានផ្តល់ជម្រកឲ្យ។

ក្រុមសកម្ម​ប្រយុទ្ធឃើដ បានប្រយុទ្ធអស់រយៈពេលជាច្រើនទសវត្សរ៍ ដើម្បីសម្រេច​បាន​ការ​គ្រប់​គ្រង​ដោយ​ខ្លួនឯង នៅភាគអាគ្នេយ៍នៃប្រទេសទួរគី។

ទីក្រុង​អង់ការ៉ា ចាត់ទុកគណបក្សពលករឃើដ (PKK) ជាក្រុមភេរវករ ហើយបាន​កំណត់​គោល​ដៅ​សមាជិករបស់ខ្លួន នៅក្នុងប្រទេសអ៊ីរ៉ាក់ និងស៊ីរីក្នុងរយៈពេលប៉ុន្មានឆ្នាំចុងក្រោយនេះ បន្ទាប់​ពី​បាន​រុញច្រានក្រុមសកម្មប្រយុទ្ធជាច្រើនចេញពីប្រទេសនេះ។