ស្របពេលនៅថ្ងៃទី២៩ ខែធ្នូ ឆ្នាំ ២០២៣នេះ រាជរដ្ឋាភិបាលប្រារព្ធខួបលើកទី២៥ នៃ​ការ​បញ្ចប់​សង្គ្រាម​ស៊ីវិលនៅកម្ពុជា និងការអនុវត្តប្រកបដោយជោគជ័យនៃនយោបាយ ឈ្នះ ឈ្នះ។ សហជីព និងកម្មកររោងចក្របានបង្ហាញការអបអរសាទរ និង​បានស​ម្តែងកា​រ​ដឹង​គុណ​ជូន​ថ្នាក់​ដឹកនាំ​គ្រប់​ជាន់​ថ្នាក់ក្នុងជួររដ្ឋាភិបាលកម្ពុជា ជាពិសេសសម្តេចតេជោ ហ៊ុន សែន អតីត​នាយក​រដ្ឋមន្រ្តី​ដែល​បាននាំមក​នូវការឯកភាព​ជាតិ​ព្រម​ទាំង​រក្សា​បាន​នូវ​សុខសន្តិភាព​យ៉ាង​ពេញ​លេញ​ដល់​ប្រទេស​ជាតិ និងប្រជាជន។

លោក គឹម ចាន់សំណាង ប្រធានសហភាពសិទ្ធិកម្មករកម្ពុជា ក្នុង​បទ​សម្ភាសន៍​ជាមួយ​ទូរទស្សន៍​ព័ត៌មាន​ ប៊ីធីវី នៅព្រឹកថ្ងៃទី២៩ ខែធ្នូនេះ បានលើកឡើងថា ដោយសារនយោបាយ ឈ្នះ ឈ្នះ របស់​សម្តេចតេជោ ហ៊ុន សែន បានធ្វើឲ្យប្រទេសមានការអភិវឌ្ឍន៍ជាលំដាប់ ជាពិសេស​ក្នុង​កំឡុង​ដាក់​ចេញនយោបាយ ឈ្នះ ឈ្នះ ធ្វើឲ្យកម្ពុជាបញ្ចប់សង្រ្គាមទូទាំងប្រទេស ពិសេស​ចុង​ឆ្នាំ​១៩៩៨​ បានបង្កើតនូវការងារ ជាពិសេសការទាក់ទាញអ្នកវិនិយោគឲ្យបើករោងចក្រក្នុងស្រុក ធ្វើ​ឲ្យ​កម្មករ​-កម្មការនីមានការងារធ្វើជាបន្តបន្ទាប់។ លោក​ក៏​មិន​ភ្លេច​ផង​ដែរ​នូវ​គុណ​បំណាច់​របស់​សម្តេច​តេជោ ដឹកនាំប្រទេសជាតិមានសុខសន្តិភាព ដែលធ្វើឲ្យប្រជាពលរដ្ឋមានការងារធ្វើ និង​អាច​ប្រកបមុខរបររកស៊ីផ្គត់ផ្គង់គ្រួសារ។

ក្រុមកម្មការិនីក្នុងរោងចក្រកាត់ដេរសម្លៀកបំពាក់ ជាវៃ ស្ថិតនៅខណ្ឌពោធិ៍សែន រាជធានីភ្នំពេញ បាន​សម្តែង​ការអរគុណចំពោះការដឹកនាំរបស់សម្តេចតេជោ និងថ្នាក់ដឹកនាំគ្រប់ជាន់ថ្នាក់ ដែល​បាន​បន្ត​ដឹកនាំប្រទេសឲ្យមានការរីកចម្រើនទៅមុខបន្ថែមទៀត ជាពិសេស​ការ​ទាក់​ទាញ​អ្នក​វិនិយោគ និងបង្កើតឱកាសការងារជាច្រើនជូនដល់ប្រជាពលរដ្ឋគ្រប់រូប។ ពួកគាត់សង្ឃឹមទៀតថា ក្រោម​ការ​ដឹកនាំរបស់សម្តេចធិបតី ហ៊ុន ម៉ាណែត នាយករដ្ឋមន្រ្តី​បច្ចុប្បន្ន​នឹង​បន្ត​ដឹកនាំ​ប្រទេស​ឲ្យ​អភិវឌ្ឍន៍​រីកចម្រើនទៅមុខថែមទៀត ជាពិសេសការ​រក្សា​ឲ្យ​បាន​នូវ​សុខដុម​រមនា​ក្នុង​ទំនាក់​ទំនង​វិជ្ជាជីវៈ និងការទទួលបាននូវសុខមាលភាពសង្គម និងអត្ថប្រយោជន៍​ផ្សេង​ៗ​របស់​កម្មករ​និយោជិត​។

សូមរម្លឹកថាការរៀបចំប្រារព្ធខួបលើកទី២៥ នៃការបញ្ចប់សង្គ្រាមស៊ីវិលនៅកម្ពុជា និង​ការ​អនុវត្ត​ប្រកប​ដោយ​ជោគជ័យនយោបាយ ឈ្នះ ឈ្នះ គឺការចងចាំនូវការ​បញ្ចប់​សង្គ្រាម​ស៊ីវិល​ទាំង​ស្រុង​នៅ​កម្ពុជា​នាំ​មក​នូវសន្តិភាព និងការឯកភាពជាតិពេញលេញ និងការអភិវឌ្ឍ​ប្រទេស​ជាតិ​មក​ដល់​សព្វ​ថ្ងៃ​នេះ៕ អត្ថបទ៖ ឈិត បូរ៉ាវី