ថ្នាក់ដឹកនាំក្រសួងមហាផ្ទៃជំរុញដល់រដ្ឋបាលរាជធានីភ្នំពេញ ត្រូវអនុវត្តការងារលើកិច្ចការពារសន្តិភាព និងការពង្រឹងខឿនសន្តិសុខជាតិឱ្យបានរឹងមាំ ។
មានប្រសាសន៍នាឱកាសអញ្ជើញបិទសន្និបាតបូកសរុបលទ្ធផលការងារឆ្នាំ២០២៣ និងលើកទិសដៅការងារឆ្នាំ២០២៤ របស់រដ្ឋបាលរាជធានីភ្នំពេញនៅព្រឹកថ្ងៃទី២៩ ខែធ្នូ ឆ្នាំ២០២៣ នាសណ្ឋាគារ រ៉េស៊ីដង់ សុខា ភ្នំពេញ ឯកឧត្តម ប្រាក់ សំអឿន រដ្ឋលេខាធិការក្រសួងមហាផ្ទៃបានថ្លែងថា រដ្ឋបាលរាជធានីភ្នំពេញ ត្រូវអនុវត្តការងារលើកិច្ចការពារសន្តិភាព និងការពង្រឹងខឿនសន្តិសុខជាតិឱ្យបានរឹងមាំ កងកម្លាំងមានសមត្ថកិច្ចជាស្នូល និងជាបង្អែករបស់ប្រជាជន ត្រូវខិតខំលើកកម្ពស់ប្រសិទ្ធភាពក្នុងការបង្ការ ទប់ស្កាត់ និងបង្ក្រាបអំពើភេរវកម្ម ឧក្រិដ្ឋកម្មឆ្លងដែនគ្រប់ប្រភេទ ជាពិសេសបទល្មើសសម្អាតប្រាក់ និងហិរញ្ញប្បទានភេរវកម្ម បទល្មើសបច្ចេកវិទ្យា បទល្មើសគ្រឿងញៀន ខុសច្បាប់ និងអំពើជួញដូរមនុស្សគ្រប់ទម្រង់ ព្រមទាំងប្រឆាំងរាល់សកម្មភាពដែលប៉ុនប៉ងបង្កនូវអសន្តិសុខក្នុងសង្គម និងការផ្សព្វផ្សាយពត៌មានមិនពិត ឬញោះញុងតាមបណ្តាញសង្គម។ ត្រូវរក្សាស្ថិរភាពសន្តិសុខផ្ទៃក្នុង ធានាប្រក្រតីភាពស្ថាប័នជាតិ ធានាសុវត្ថិភាពជូនឥស្សរជនជាន់ខ្ពស់ជាតិ និងអន្តរជាតិ ព្រមទាំងព្រឹត្តិការណ៍នយោបាយជាតិ តំបន់ និងអន្តរជាតិដែលរៀបចំឡើងនៅកម្ពុជាពិសេស ការដំណើរការបោះឆ្នោតជ្រើសតាំងសមាជិកព្រឹទ្ធសភា អាណត្តិទី៥ និងការបោះឆ្នោត ជ្រើសរើសក្រុមប្រឹក្សារាជធានី ខេត្ត ក្រុង ស្រុក ខណ្ឌអាណត្តិទី៤ ឆ្នាំ២០២៤នាពេលខាងមុខ។
ឯកឧត្តម ប្រាក់ សំអឿន បន្ថែមថា ត្រូវទប់ស្កាត់ការបង្កើតកងកម្លាំងប្រដាប់អាវុធខុសច្បាប់ ឬការបង្កើតតំបន់អបគមន៍ ព្រមទាំងប្រឆាំងរាល់ឧបាយកលសកម្មភាពនៃការប៉ុនប៉ងផ្តួលរំលំរាជរដ្ឋាភិបាលស្របច្បាប់។ ត្រូវគិតគូរពីវិធានការ និងមធ្យោបាយនានាក្នុងការបង្ការ និងពន្លត់អគ្គិភ័យ ជាពិសេសនៅតាមសំណង់អាគារខ្ពស់ៗ រោងចក្រ សហគ្រាស ផ្សារ និងផ្ទះសំបែងប្រជាពលរដ្ឋ។ បន្តជំរុញចលនាអនុវត្តគោលនយោបាយភូមិ ឃុំ សង្កាត់មានសុវត្ថិភាព ដើម្បីលើកកម្ពស់ការចូលរួមបង្ការ ទប់ស្កាត់ បង្ក្រាបបទល្មើសនានាឱ្យកាន់តែមានប្រសិទ្ធភាពថែមទៀត។ ក្នុងឱកាសចូលឆ្នាំសកល ឆ្នាំ២០២៣-២០២៤ រដ្ឋបាលរាជធានីភ្នំពេញត្រូវយកចិត្តទុក្ខដាក់ក្នុងការថែរក្សាសន្តិសុខ សុវត្ថិភាព និងសណ្តាប់ធ្នាប់សាធារណៈជូនប្រជាពលរដ្ឋ ភ្ញៀវទេសចរជាតិ និងអន្តរជាតិ ដែលធ្វើដំណើរមកកំសាន្តនៅរាជធានីភ្នំពេញ ពិសេសទីតាំងនានាដែលរៀបចំព្រឹត្តិការណ៍ និងការប្រគុំតន្ត្រី សិល្បៈឱ្យមានភាពសប្បាយរីករាយ និងប្រកបដោយសុវត្ថិភាព។ បន្ដទប់ស្កាត់ និងបង្ក្រាបបទល្មើស លួច ឆក់ ប្លន់ ការប្រើប្រាស់ និងជួញដូរគ្រឿងញៀនខុសច្បាប់ ល្បែង ស៊ីសងខុសច្បាប់ ការជួញដូរមនុស្សតាមគ្រប់ទម្រង់ ការជំរិតទារប្រាក់ បទល្មើសឆបោកតាមប្រព័ន្ធបច្ចេកវិទ្យា និងសកម្មភាពក្មេងទំនើងជាដើម។
ឯកឧត្តម ប្រាក់ សំអឿន មានប្រសាសន៍ទៀតថា ផ្អែកតាមផែនការយុទ្ធសាស្ត្រទសវត្សរ៍សុវត្ថិភាពចរាចរណ៍ផ្លូវគោក កងកម្លាំងនគរបាលចរាចរណ៍ត្រូវពង្រឹងការអនុវត្តច្បាប់ឱ្យបានម៉ឺងម៉ាត់។ បន្តពង្រឹងទាំងគុណភាព និងប្រសិទ្ធភាពនៃការផ្តល់សេវាសាធារណៈតាមរយៈការពង្រឹង និងកែលម្អស្ថាប័នសាធារណៈនៅគ្រប់ថ្នាក់ឱ្យក្លាយ ជារដ្ឋបាលទំនើប មានសមត្ថភាព និងស្អាតស្អំ។ ទន្ទឹមនឹងការអភិវឌ្ឍរីកចម្រើនយ៉ាងឆាប់រហ័ស រាជធានីភ្នំពេញក៏ជួបនឹងបញ្ហាប្រឈមមួយចំនួនដូចជាការសាងសង់សំណង់ខុសច្បាប់ បញ្ហាអនាម័យបរិស្ថាន សោភ័ណ្ឌភាពទីក្រុង ការគ្រប់គ្រងកាកសំណល់ ទឹកកខ្វក់ ការកកស្ទះចរាចរ ជំនន់ទឹកភ្លៀងជាដើម។ ដូច្នេះឯកឧត្ដមសូមលើកទឹកចិត្តដល់រដ្ឋបាលរាជធានីភ្នំពេញត្រូវយកចិត្តទុកដាក់ដោះស្រាយបញ្ហាប្រឈមទាំងនេះបន្ថែមទៀត ដោយគិតគូររៀបចំផែនការ និងវិធានការនានាដែលត្រូវអនុវត្តជាក់ស្តែង ដោយផ្អែកលើផែនការមេប្រើប្រាស់ដីធ្លីរបស់រាជធានីភ្នំពេញឆ្នាំ២០៣៥ ផែនទីបង្ហាញផ្លូវយុទ្ធសាស្ត្រស្តីពីទីក្រុងឆ្លាត និងមានចីរភាពឆ្នាំ២០២២-២០៣៥ និងស្នើថ្នាក់ដឹកនាំរដ្ឋបាលរាជធានីភ្នំពេញត្រូវពង្រឹងការប្រឡងជ្រើសរើសមន្ត្រីរាជការ ការគ្រប់គ្រង និងចាត់ចែងមន្ត្រីរាជការ ការដំឡើងថ្នាក់ ឋានន្តរស័ក្ត និងការតែងតាំងមុខតំណែង ត្រូវតែមានតម្លាភាព និងគណនេយ្យភាព មិនបក្សពួកនិយម និងគ្រួសារនិយមនោះឡើយ។ ផ្តល់ការលើកទឹកចិត្តដល់មន្ត្រីដែលខិតខំបំពេញការងារបានល្អ មានសមត្ថភាព មានស្នាដៃ និងជំរុញការបណ្តុះបណ្តាលជំនាញ និងកសាងសមត្ថភាពដល់មន្ត្រីរាជការឱ្យសមស្របទៅនឹងការវិវត្តនៃការងារ និងបច្ចេកវិទ្យាឌីជីថល៕ អត្ថបទ៖ ប្រាក់ វ៉ាន់ដា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
